सुजाताको क्यान्सर ‘फलोअप
काठमाडौः चिकित्सकले क्यान्सर जाँच र उपचार नेपालमै सम्भव भएकाले विदेश जान नपर्ने दाबी गरिरहेका बेला मलेसियामा स्तन क्यान्सरको शल्यक्रिया गरेर फर्केकी कांग्रेस नेत्री सुजाता कोइरालाको ‘फलोअप' सिंगापुरमा हुने भएको छ ।
कोइरालाले शल्यक्रियापछि क्यान्सर फैलिए÷नफैलिएको जाँच सिंगापुरको सेन्ट पिटर्सबर्ग अस्पतालमा गर्न लागेकी हुन् । उनका स्वकीय सचिव लक्ष्मण थपलियाका अनुसार आगामी आइतबार उनी ‘फलोअप' का लागि सिंगापुर जानेछिन् । ‘उहाँको स्तनमा देखिएको क्यान्सर पहिलो स्टेजको रहेछ ।
चिकित्सकले तत्कालै शल्यक्रिया गरी क्यान्सर भएको भाग हटाएका छन्,' थपलियाले अन्नपूर्णसँग भने, ‘अब त्यसमा क्यान्सर फैलिएको छ कि छैन भन्ने जाँच गर्न सिंगापुर जान लाग्नुभएको हो ।'
आइक्यापको अन्तर्राष्ट्रिय सम्मेलनमा भाग लिएर नेपाल फर्कने बेला उनले स्वास्थ्य परीक्षण गराएकी थिइन् । रिपोर्टमा क्यान्सर पुष्टि भएको पाइएपछि तत्कालै शल्यक्रिया गरेर एक हप्ता आरामपछि उनी नेपाल फर्केकी थिइन् ।
अहिले पनि उनले सम्पूर्ण भेटघाटका कार्यक्रम स्थगित गरेर घरमै आराम गरिरहेकी छन् । उनले ‘फलोअप' गर्न लागेको अस्पतालमा उनका बुवा एवं पूर्वप्रधानमन्त्री स्वर्गीय गिरिजाप्रसाद कोइरालाको पनि उपचार गरिएको थियो ।
‘नियमअनुसार सुविधा पाउनुपर्छ'
कोइरालाले महँगो अस्पतालमा ‘फलोअप' गर्न लागेको टिप्पणी भइरहेका बेला उनको उपचारमा सरकारले सहयोग गर्नुपर्ने भन्दै दबाब आउन थालेको छ । उनीनिकट कांग्रेस नेताले सरकारले यसबारे छिट्टै निर्णय लिनुपर्ने बताइरहेका छन् ।
कोइरालाका स्वकीय सचिव लक्ष्मण थपलियाले बाहिर प्रचार गरिएजस्तो कोइरालाको उपचारका लागि सरकारसँग एक करोड रुपैयाँ नमागेको भए पनि अन्य व्यक्तिले पाउने र पाएको जस्तै सुविधा कोइरालाले पनि पाउनुपर्ने बताए । ‘राज्यले विशिष्ट व्यक्तिको उपचारमा जे सुविधा उपलब्ध गराउँदै आएको छ, त्यो मात्रै पाउनुपर्छ भनिएको हो,' उनले भने अरू सबैले पाउने उहाँले नपाउने भन्ने त हुँदैन होला ।
' कांग्रेस विदेश विभागकी प्रमुखसमेत रहेकी उनले सिंगापुरमा जाँच गर्ने निधो गरेपछि उपचार खर्चबारे कांग्रेस नेताबीच छलफलसमेत भएको छ ।
प्रतिक्रिया दिनुहोस !
