झाडापखालाबाट बालकको मृत्यु, ३४ बिरामी
सिरहा: सिरहाको औरहीमा सोमबारदेखि फैलिएको झाडापखालाको प्रकोपले एक बालकको ज्यान जानुको साथै ३४ जना बिमारी परेका छन् । झाडापखालाले औरही ३ का ७ वर्षीय बर्जुन यादवको ज्यान गएको हो । झाडापखाला औरही गाविसको वडा नं. २, ३, ५ र ८ मा फैलिएको छ ।
झाडापखाला फैलिएपछि स्थानीय बासिन्दा चिन्तित छन् । जिल्ला जनस्वास्थ्य कार्यालयले भने हैजा नभएको भन्दै सामान्य झाडापखाला भएकोले नआत्तिन सर्वसाधारणलाई अनुरोध गरेको छ ।
ढिलो गरी अस्पताल पुर्याएको हुँदा यादवको मुत्यु भएको जिल्ला अस्पताल सिरहाले जनाएको छ । अन्य बिमारी सबैको स्थानीय प्राथमिक स्वास्थ्य केन्द्रमा उपचार भइरहेको छ । प्राथमिक स्वास्थ्य केन्द्रमा ठाउँको अभावमा चिसो भुईंमै राखेर उपचार भइरहेको छ ।
बिरामीमा पेट दुख्ने, बान्ता हुने र पखाला लाग्ने लक्षण देखिएको छ । झाडापखालाबाट बालबालिका सबैभन्दा धेरै प्रभावित भएका छन् । बिरामीमध्ये १४ जना १६ वर्षभन्दा कम उमेरका रहेका छन् । एक घन्टामा ५/६ पटकभन्दा बढीपटक पखाला लाग्ने गरेको उपचारमा संलगन चिकित्सकको भनाइ छ ।
प्राथमिक स्वास्थ्य केन्द्रका निमित्त प्रमुख रामनारायण सिंहले झाडापखालाका बिरामी दैनिक स्वास्थ्य केन्द्रमा आउने गरेको र झाडापखाला अझै नियन्त्रण नभएको बताए ।
झाडापखाला नियन्त्रणका लागि इपिडिमियोलोजी रोग नियन्त्रण महाशाखा, काठमाडौं र जिल्ला स्वास्थ्य कार्यालयको टोली गाउँमै पुगेर उपचार गरिरहेको जिल्ला जनस्वास्थ्य प्रमुख दयाशंकर लाल कर्णले बताए । उनले पानीका कारण झाडापखाला लागेको हुनसक्ने भन्दै पानी परीक्षणको लागि काठमाडौं पठाइएको जानकारी दिए ।
प्रतिक्रिया दिनुहोस !
