विद्यालयको जग्गामा प्रतीक्षालय 

नेपालगन्जः धम्बोजी उच्चमावि नेपालगन्जको जग्गामा स्थानीय एक क्लबले प्रतीक्षालय निर्माण गर्न थालेको छ । नेपालगन्ज १ धम्बोजीस्थित विद्यालयको पुरानो भवन ९हाल शान्ति विद्या निकेतन सञ्चालनमा रहेको०को पर्खालबाहिर विद्यालयको नाममा दर्ता स्रेस्ता रहेको जग्गा कब्जा गरी क्लबले प्रतीक्षालय निर्माण गरिरहेको छ ।

कब्जा गरिएको जमिनमा धम्बोजी स्पोटर्स क्लबले प्रतीक्षालय बनाइरहेको छ । विद्यालय व्यवस्थापन समितिका अध्यक्ष धनबहादुर चन्दले विद्यालयको कित्ता नं १९३ को १२७१।९१ वर्गमिटर क्षेत्रफल रहेको जग्गा क्लबले कब्जा गरेको बताए । ‘यो विद्यालयको लालपुर्जाको जग्गा हो, जबर्जस्ती क्लबले जग लगाइरहेको छ', उनले भने ।

विद्यालयले निर्माण रोक्न जिल्ला प्रशासन कार्यालयमा कात्तिक ११ गते नै उजुरी दिइएको उनको भनाइ छ । उजुरी दिएको १५ दिन हुन लागे पनि अहिलेसम्म सुनुवाइ नभएको उनको गुनासो छ । ‘यता धमाधम संरचना बनाइरहेका छन् । विद्यालयले लड्ने–भिड्ने कुरै हुँन्नपूर्दैन, त्यसो गर्न हामी सक्दैनौं, केवल कानुनसम्मत रूपमा जाने हो, उनीहरू जबर्जस्ती गरिरहेका छन् ।'

विद्यालयले उक्त स्थानमा २ वर्षअघि सटर निर्माण गर्ने प्रक्रिया थालेपछि क्लबवालाले अवरोध गरेका थिए । स्थानीय शान्ति समितिले विद्यालयलाई उपलब्ध गराएको २० लाख अनुदान सहयोगबाट पाँचवटा सटर निर्माण प्रक्रिया थाल्ने क्रममा क्लबका पदाधिकारीले अवरोध गरेको विद्यालयकी प्राचार्य किरण आचार्यले जानकारी दिइन् । सटर निर्माणका लागि शान्ति समितिबाट आएको पहिलो किस्ताको ३ लाख रुपैयाँ क्लबको अवरोधपछि फिर्ता गएको छ ।

‘विद्यालयको आयस्रोतका लागि सटर निर्माण गर्न लागेका थियौं,' उनले भनिन्, ‘क्लबवालाले झन्डा गाडेर दिएनन् । अहिले कब्जा गरेर आफै जग पो हाल्न थाले ।' यो विद्यालयमा नेपालगन्ज नगरभित्रकै सबैभन्दा बढी विद्यार्थीको चाप छ । उक्त विद्यालयमा एक हजार छ सय ५१ जना विद्यार्थी अध्ययनरत छन् । बाँकेकै नमुनाका रूपमा रहेको यो विद्यालयमा कक्षा ९ देखि १२ सम्म प्राविधिक विषयको समेत पठनपाठन हुने गरेको छ । ‘विद्यार्थीको चाप छ, शिक्षक पर्याप्त छैनन्, आयस्रोतसमेत छैन, आयस्रोत बढाउन नसकेपछि अहिले विद्यालय चलाउनै मुस्किल छ', आचार्यले भनिन् ।

यता प्रमुख जिल्ला अधिकारी रविलाल पन्थले विद्यालय जग्गाको संरक्षण गरिने बताए । विद्यालय सम्पत्ति संरक्षण समिति संयोजकसमेत रहेका उनले विद्यालयको जग्गा कब्जाको विषय अनुसन्धान गरेर अगाडि बढ्ने दाबी गरे । ‘के भएको हो, त्यो जग्गा विद्यालयकै नाममा छ कि छैन, त्यसको अनुसन्धान गर्छौं', उनले भने ।