नवनिर्वाचित राष्ट्रपति ट्रम्प भन्छन्-यो अमेरिकाले विभाजनका घाउहरु पुर्ने समय हो

आफ्नो विजय सुनिश्चित हुनासाथ गत नोभेम्बर ८ को साँझपख अमेरिकाको न्यू योर्कमा ट्रम्पले प्रसन्न मुद्रामा भाषण दिए । आफ्ना सहयोगी, परिवारजन र श्रीमतीसँग स्टेजमा पुगेका उनले निकै गर्विलो आवाजमा यसो भनेः

धन्यवाद । धन्यवाद सबैलाई । तपाईहरुलाई पर्खाएकोमा माफी माग्छु । गाह्रो काम, अति गाह्रो । तपाईहरु सबैलाई धन्यवाद ।

भर्खरैमात्र मलाई विदेशमन्त्री क्लिन्टनले फोन गर्नुभयो । उहाँले हामी सबैलाई बधाइ दिनुभयो । मैले उहाँलाई र उहाँको परिवारलाई निकै निकै कडा प्रतिस्पर्धा कायम गर्नुभएकोमा बधाई दिएँ । उहाँले निकै शानदार तरिकाले भिड्नुभयो । हिलारीले निकै लामो समयदेखि निकै कठिन काम गर्नुभएको छ । उहाँले गर्नुभएको देश सेवाप्रति हामी हादिर्क आभार प्रकट गर्दछौं ।

मैले यो भित्री हृदयदेखि नै भनिरहेछु । यो अमेरिकाले आफ्ना विभाजनका घाउहरु पुर्ने समय हो । हामी अब एकजुट हुनु छ । देशभरका सबै रिपब्लिकन, डिमोक्रयाट र स्वतन्त्र व्यक्तिहरु समक्ष मेरो आह्वान छ, यो हामी एकजुट हुने समय हो ।

यो मेरो वाचा गर्ने समय हो । म हाम्रो भूमीका सबै नागरिक सामु सबै अमेरिकीको राष्ट्रपति बन्ने प्रण गर्दछु । यो मेरा लागि निकै महत्वपूर्ण छ । विगतमा मलाई सहयोग नगर्ने निर्णय गर्नुभएको निकै कम गर्नुभएका हरेक समक्ष म तपाईको निर्देशन र सहयोगका लागि पुग्नेछु जसले गर्दा हामी सहकार्य गर्नेछौं र हाम्रो महान् देशलाई एकिकृत गर्नेछौं ।

मैले शुरु देखि नै भन्दै आएको छु, हाम्रो कुनै अभियान होइन यो त नपत्याइँदो महान् आन्दोलन हो । र यो आन्दोलन यो देशलाई माया गर्ने तथा यसको सुन्दर भविष्य एवं आफ्नै र परिवारको सुन्दर भविष्यको कामना गर्ने करोडौं मेहनती महिला तथा पुरुषहरुले बनेको छ ।

यो आन्दोलन सबै जाती, धर्म र पृष्ठभूमीबाट आएका अमेरिकीहरुबाट निर्माण भएको छ जसले हाम्रो सरकारले जनताको सेवा गर्ने आशा र आकांक्षा राख्दछन् ।
सहकार्य गर्दै हामीले हाम्रो राष्ट्रको पुनःनिर्माण र अमेरिकी सपनाको नविकरण थाल्नेछौं । मैले आफ्नो जीवनको मुख्य हिस्सा व्यवसायमा खर्चेको छु । त्यहाँ मैले संसारभरका मानिसहरुको नरोकिने शक्ति देखेको छु ।

त्यही शक्ति हामी हाम्रो देशका लागि निर्माण गर्न चाहन्छु । विराट शक्ति । यो सुन्दर हुनेछ हाम्रो देशको लागि । हरेक अमेरिकीले आफ्नो पुर्ण शक्ति महसुस गर्ने अवसर पाउनेछन् । हाम्रो देशका हरेक बिर्सिएका महिला र पुरुष अब विस्मृत रहनेछैनन् ।

हामी हाम्रा भित्री शहरहरु मजबुत बनाउनेछौं । राजमार्ग, पुल, सुरुङ, विमानस्थल, विद्यालय र अस्पतालहरु पुनःनिर्माण गर्नेछौं । हामी हाम्रो भौतिक संरचनाहरु पुनःनिर्माण गर्नेछौं । हामी हाम्रा सेवानिवृत्तहरुको ख्याल राख्नेछौं ।

मैले आफ्नो चुनावी अभियानको १८ महिने अभियानमा भेटेका ती सेवानिवृत्तहरु साँच्चिकै उदार थिए । उहाँहरुसँग मैले चुनावी अभियानको दौरान खर्चेका क्षणहरु निकै मूल्यवान थिए । हाम्रा सेवानिवृत्तहरु साँच्चिकै अपत्यारिला मानिस हुन् ।

हामी राष्ट्रिय वृद्धि र नवीकरणको कार्यलाई उच्च विन्दुमा पुर्याउनेछौं । म हाम्रा जनताको सिर्जनशील क्षमतालाई उत्साह दिनेछु र उनीहरुको विराट क्षमतालाई उत्तम र चम्किलो बनाउन कोशिस गर्नेछु । यही नै हुनेछ । हामीसँग बृहत आर्थिक योजना छ ।

यो अमेरिकाले आफ्ना विभाजनका घाउहरु पुर्ने समय हो । हामी अमेरिकी अब एकजुट हुनु छ । 

हामी हाम्रो वृद्धिलाई दोब्बर गराउनेछौं । संसारमै हाम्रो अर्थतन्त्र सबैभन्दा मजबुत हुनेछ । सँगसँगै हामीसँग साझेदारी गर्न चाहने अरु राष्ट्रसँग पनि हामी साझेदारी कायम गर्नेछौं । हामी महान् सम्बन्धहरुको आशा गर्दछौं । कुनै पनि सपना पुरा गर्नै नसक्ने ठूलो हुँदैन । कुनै पनि चुनौती अभेद्य हुँदैनन् । भविष्यका लागि हामीले चिताएका केही पनि लक्ष्य हाम्रो पहुँचभन्दा पर हुँदैनन् ।

अमेरिका कुनै पनि पक्षमा उत्तम भन्दा तल रहनेछैन । हामीले हाम्रो देशको भाग्य र सपना सबै भन्दा ठूलो, बोल्ड र साहसी भएको दावी गर्नैपर्छ । हामीले त्यसै गर्नैपर्छ । हामीले हाम्रो देशको सपना तय गर्नेछौं, सुन्दर सपना र त्यसमा पुनः सफलता पाउनेछौं ।

म सिंगो विश्व समुदायलाई भन्न चाहन्छु, हामी हाम्रो अमेरिकाको स्वार्थलाई प्राथमिकता दिंदैगर्दा हरेकसँग न्यायपूर्वक व्यवहार गर्नेछौं । सबै देशका सबै जनतासँग हामी साझा भूमी खोज्नेछौं, शत्रुता होइन । मित्रता खोज्नेछौं, द्वन्द्व होइन । यही बेलामा नै म यो क्षणसम्म ल्याइपुर्याउने र यो विजयलाई ऐतिहासिक बनाउने सबै जनतालाई धन्यवाद दिन्छु ।

सबैभन्दा पहिला म मलाई अहिले हेरिरहनुभएका अभिभावकलाई धन्यवाद दिन चाहन्छु । उहाँहरु महान् हुनुहुन्छ । मैले उहाँहरुबाट धेरै सिकेको छु । हरेक पक्षमा उहाँहरु विस्मयकारी हुनुहुन्छ । साँच्चिकै महान् अभिभावक । यो रातमा मसँगै रहेका मेरा दिदीबहिनीहरु म्यारेन र एलिजाबेथलाई पनि धन्यवाद दिन चाहन्छु । कहाँ छन् उनीहरु ? उनीहरु यतै कतै छन् ।

उनीहरु साँच्चिकै लज्जालु छन् । र मेरो भाईलाई पनि । ऊ मेरो महान् मित्र हो । कहाँ छ रोबर्ट ? ओ रोबर्ट ? र मेरा दिवंगत दाजुलाई पनि । रमाइलो केटो । रमाइलो परिवार । म साँच्चिकै भाग्यमानी हुँ । मेलानीया र डन, इभान्का र इरिक, टिफानी र ब्यारोन म तिमीहरु सबैलाई प्रेम गर्छु । म धन्यवाद दिन्छु । विशेषगरी मलाई समय दिएकोमा । यो साँच्चिकै गाह्रो काम हो ।

राजनीतिक विषय साँच्चिकै गाह्रो र घिनलाग्दो हुन्छ । त्यसैले पनि म मेरो परिवारलाई धन्यवाद दिन्छु । मलाई सबैले अपत्यारिलो साथ दिनुभएको छ । म तपाईलाई भन्नेछु हामीसँग बृहत जनसमुदाय छ । उनीहरु भन्थे हामीसँग थोरै सहकर्मी छन् । तर त्यस्तो होइन । हेर्नुस त हामीसँग भएका जनतालाई ।

म पूर्व मेयर रुडी ग्युलीआनीलाई विशेष धन्यवाद दिन्छु । उहाँ अपत्यारीला मानिस हो । साँच्चिकै अविश्वसनीय । उहाँले हामीसँगै यात्रा गर्नुभयो । हामी बैठकहरुमा सँगै भयौं । उहाँ कहिले फेरिनुभएन । खोई रुडी ? (सबैले रुडी, रुडी भन्छन्) ।

गभर्नर क्रिस क्रिस्टी अर्का अपत्यारीला । धन्यवाद क्रिस । प्रथम मानिस, प्रथम सिनेटर, प्रथम मेजर, प्रमुख राजनीतिज्ञ, म उहाँबारे भन्छु, उहाँ वासिङटनमा निकै सम्मानित हुनुहुन्छ किनभने उहाँ तपाईले देखेभन्दा पनि स्मार्ट हुनुहुन्छ । अनि सिनेटर जेफ सेस्सन्सलाई पनि धन्यवाद । खोई जेफ ? अर्को महान मानिस, निकै कडा प्रतिस्पर्धी । उहाँ सहज हुनुहुन्थेन ।

हामीसँग अर्को त्यस्तै विशेष मानिस हुनुहुनथ्यो । म उहाँका सबै रिपोर्ट पढ्थें । उहाँ एकदमै अपत्यारिला स्टार हुनहुन्छ । के तपाईहरु अनुमान गर्न सक्नुहुन्छ को हो उहाँ ? उहाँ हो रेन्स । रेन्स साँच्चिकै सुपरस्टार हुन् । निकै मेहनती केटो । रेन्स आखिरमा हामीले यो सबै गरिछोड्यौं । ल यहाँ आउ त रेन्स ।
(रेन्स भन्छन्ः महिला तथा सज्जनवृन्द, संयुक्त राज्य अमेरिकाका अर्का राष्ट्रपति डोनाल्ड ट्रम्प सबैलाई धन्यवाद । यो मेरोलागि ठूलो सम्मान हो । भगवानले सबैको रक्षा गरुन् । धन्यवाद भगवान ।)

अनि धन्यवाद सेक्रेट सर्भिसका मानिसहरुलाई पनि । उनीहरु कठिन र स्मार्ट छन् । उनीहरु तिक्ष्ण छन् । अनि धन्यवाद न्यू योर्क शहरलाई पनि । यहाँका दर्शक जनतालाई पनि । कहिलेकाहीं उनीहरुको दुर्भाग्यवश कम आंकलन भयो । हामीले उनीहरुको मूल्यांकन गर्रयौं । त्यसैले यो ऐतिहासिक क्षण भएको छ । तर साँच्चिकै ऐतिहासिक हुनका लागि हामीले महान् काम गर्नैपर्छ । म तपाईहरुसँग वाचा गर्छु कसैलाई पनि शिर निहुराउन दिनेछैन । हामी महान् काम गर्नेछौं । साँच्चिकै महान् । तपाईहरुले भन्नुहुनेछ–साँच्चिकै भन्नुहुनेछ– तपाईहरुले खोजेजस्तै भयो– तपाईहरु साँच्चिकै गर्व गर्नुहुनेछ ।

लौ अब हाम्रो अभियान सकिएको छ र यो आन्दोलनको हाम्रो कार्यभार अब शुरु भएको छ । हामी तुरुन्तै अमेरिकी जनताका लागि काम गर्न शुरु गरिहाल्नेछौं । र हामी तपाईल आफ्नो राष्ट्रपतिप्रति गर्व गर्न सक्नेगरी काम गर्न शुरु गरिहाल्नेछौं ।

यो अद्भुत साँझ हो । यो दुई वर्षकै अदभुत साँझ हो । म यो देशलाई माया गर्छु । धन्यवाद । सबैलाई धन्यवाद ।