कोदालोको पासोले हानेर छिमेकी वृद्ध दम्पत्तिको हत्या
नुवाकोटः एक युवकले लिखु गाविसमा एक वृद्ध दम्पत्तीको हत्या गरेका छन् । हत्या गर्ने युवकलाई प्रहरीले पक्राउ गरी इलाका प्रहरी कार्यालय सिक्रेको नियन्त्रणमा राखेको छ ।
नुवाकोटको सदरमुकामदेखि दुई दिनको पैदल दुरीमा रहेको दुर्गम लिखु गाविस २ मजुवा माथिल्लो टोलका ७० बर्षीय धनबहादुर तामाङ र उनकी श्रीमती ६५ बर्षीया कान्छी तामाङको बुधबार राति ९ बजे छिमेकी युवकले हत्या गरेको जिल्ला प्रहरी कार्यालय नुवाकोटका प्रहरी निरीक्षक जीतेन्द्र बस्नेतले जानकारी दिए ।
तामाङ दम्पत्तिको छिमेकी २४ बर्षीय रवि तामाङले हत्या गरेको प्रहरीले जनाएको छ । आपसी झैझगडामा पहिले मुक्का र ढुंगाले प्रहार गर्दै अन्तिममा कोदालोको पासोले हानेर टाउँको फुटाइ दम्पत्तिको हत्या भएको प्रहरीले जनाएको छ ।
जिल्ला प्रहरी कार्यालय विदुरबाट गएको प्रहरी टोलीले कानुनी प्रक्रिया पुरा गरी शव जिल्ला अस्पतालमा ल्याएको छ । हत्याको कारण भने अझै खुल्न नसकेको प्रहरीको भनाइ छ ।
प्रतिक्रिया दिनुहोस !
