काठमाडौं: पाकेटमारेर लुटेको चेक बैंकमा पुगेर साट्दासाट्दै गरेको अवस्थामा प्रहरीले दुई पाकेटमारलाई पक्राउ गरेको छ । पक्राउ पर्नेमा ललितपुर कार्यविनायकका बिसु रोक्का र उनका भाइ सञ्जीव रोक्का छन् । तीनकुने निवासी केशवराज फुलाराको सोमबार नयाँ बानेश्वरबाट कुपन्डोलतर्फ सार्वजनिक बसमा यात्रा गरिरहेका बेला नबिल बैंकको दुई लाख ५५ हजार पाँच सय ५५ रुपैयाँ अंकित चेक पाकेट मारिएको थियो ।
फुलाराले चेकसहितको मनीपर्स पाकेट मारेको जानकारी बैंक र प्रहरीलाई गराएका थिए । प्रहरीले बैंकसँग समन्वय गरेर चेक नम्बरको आधारमा चेक साट्न आउने व्यक्तिलाई नियन्त्रणमा राख्न खबर गरेको थियो । बिसुसँग नागरिकता नभएपछि उनले भाइ सञ्जीवको नागरिकता लिएर नबिल बैंकको कुपण्डोल शाखामा चेक साट्न पुगेका थिए ।
चेक साट्दासाट्दै गरेको अवस्थामा बैंकका कर्मचारीले दुवैजनालाई प्रहरीको जिम्मा लगाउन सफल भए । 'फुलाराले तत्काल बैंकमा खबर गरेकाले पनि पाकेटमारलाई रंगेहात पक्राउ गर्न सफल भइयो,' महानगरीय प्रहरी परिसर ललितपुरका प्रमुख एसएसपी पीताम्बर अधिकारीले भने ।
घटना सार्वजनिक गर्न परिसरले मंगलबार पत्रकार सम्मेलनको आयोजना गरेको थियो । रोक्का दाजुभाइ पक्राउ घटनाको अनुसन्धान गर्दै जाँदा प्रहरीले मोबाइलमात्रै पाकेटमार्ने अर्को गिरोहलाई पक्राउ गरेको छ । एसएसपी अधिकारीका अनुसार एक चिनियाँ नागरिकको एक लाख बढी रुपैयाँ पर्ने मोबाइल पाकेटमारेको घटना अनुसन्धान गर्दा थप दुईजना मकवानपुर चुरियामाई घर भएर बसुन्धरा बस्ने धनराज रुम्बा र सिनामंगल बस्ने सन्तोष बस्याल पक्राउ परेका छन् ।
'रोक्का दाजुभाइको कनेक्सन खोज्दै जाँदा रुम्बा र बस्याल पक्राउ परे । उनीहरूले पाकेटमारको सञ्जाल विस्तार गरेको अनुसन्धानबाट खुलेको छ', एसएसपी अधिकारीले भने ।
यसबीच बेलायतको नक्कली पआर बनेर ठगी गर्ने दुईजनालाई प्रहरीले पक्राउ गरेको छ ।पक्राउ पर्नेमा ललितपुर हरिसिद्धिका गोविन्द बैद्य र महालक्ष्मी बस्ने विकास महर्जन छन् । यीमध्ये मुख्य योजनाकार वैद्य हुन् । उनले आफू बेलायतको पीआर हुँ भन्दै पाटन अस्पताल र नेपाल मेडिकल कलेज जोरपाटीको डाक्टरसमेत रहेको भनेर बेलायत पठाइदिन्छु भनेर पैसा ठग्दै आएको प्रहरी दाबी छ ।
वैद्यले सातदोबाटोका भरतबहादुर मल्लबाट पाँच लाख, रामेछाप माकादुमका खड्गबहादुर कार्कीबाट ५० हजार, रामेछाप गेलुका दलबहादुर खत्रीबाट ८० हजार, ललितपुर धापाखेलबाट विनिल महर्जनबाट ३० हजार, ठैबका सचिन थापाबाट ८० हजार र लगनखेलका जनम मालाकारको साथबाट एक लाख ५० हजार गरी जम्मा आठ लाख ९० हजार ठगी गरेको पीडितले उजुरीमा उल्लेख गरेका छन् ।
वैद्यले कसमस प्रिन्टिङ सोलुसनका सञ्चालकसमेत रहेका महर्जनको प्रेसबाट नक्कली पीआर होल्डरको कार्ड, डाक्टरको परिचयपत्रलगायतका कागजपत्र बनाएका थिए । 'नक्कली डाक्टर र बेलायतको पीआर होल्डरका नाममा ठगी गरेको पाइयो । वैद्यबाट अन्य मानिसहरू पनि ठगिएको आशंकामा थप अनुसन्धान भइरहेको छ', एसएसपी अधिकारीले भने ।
प्रतिक्रिया दिनुहोस !
