फुटबल टिमलाई उपराष्ट्रपति पुनको बधाइ
काठमाडौंः उपराष्ट्रपति नन्द बहादुर पुन ‘पासाङ’ ले नेपाली राष्ट्रिय फुटबल टिमलाई बधाई दिएका छन् ।
नेपाली फुटबलमा अहिलेसम्मकै ठूलो उपलब्धि हात पार्न सफल भएको बन्दै उनले बधाइ सन्देश दिएका हुन् । मलेसियाको कुचिङमा भएको एएफसी सोलिडारिटी कपको फाईनल खेलमा मकाउलाई स्तब्ध पार्दै पहिलो पटक एशियाली फुटबल महासंघ (एएफसी)को प्रतियोगिता जितेकोमा उनले प्रमुख प्रशिक्षक ग्योटु कोजीलाई बधाई दिएका हुन् । ‘नेपाली फुटबल क्षेत्रले ऐतिहासिक उपलब्धि प्राप्त गरेकोमा म अत्यन्त हर्षित र गौरवान्वित भएको छु ’उनले भने ।
उनले खुशीयालीको सुखद अवसरमा राष्ट्रको गरिमा बढाई नेपाल र नेपालीको शीर उचो बनाएको भन्दै नेपाली राष्ट्रिय फुटबल टिमका प्रमुख प्रशिक्षक, प्रशिक्षक, कप्तान, खेलाडी तथा खेल सम्बद्ध पदाधिकारीलाई धन्यवादसहित हृदयदेखि नै हार्दिक बधाइ तथा शुभकामना व्यक्त गरेका छन् ।
एएफसी प्रतियोगिता खेल्न थालेको ३२ वर्षपछि नेपालले सफलता गरेका गरेको हो । एक वर्षको अन्तरालमा यसअघि बंगलादेशको ढाकामा आयोजित बंगबन्धु गोल्ड कप र भारतको गुवाहाटीमा भएको १२ औं दक्षिण एशियाली खेलकूद प्रतियोगिता अन्तर्गत फुटबलको स्वर्ण पदक जित्न सकेकोमा उनले स्मरण गरेका छन् ।
‘यसबाट नेपाली फुटबलले ठूलो फड्को मारेको पुष्टि हुन्छ । अन्तर्राष्ट्रिय प्रतियोगितामा नेपाली खेलाडी उच्च मनोबालका साथ मैदानमा उत्रने र यी भन्दा ठूला सफलताहरु हाँसिल गर्नेमा म विश्वस्त छु ।’ उनले दिएको बधाई सन्देशमा भनिएको छ ।
राष्ट्रको सान विश्व सामु चिनाउने प्रशिक्षक र खेलाडीको राज्यले उचित सम्मान गर्ने उनले विश्वास दिएका छन् ।