सोलिडारिटी कप जितेर आएको नेपाली टोलीलाई यसरी गरियो स्वागत
काठमाडौं: मलेसियामा सम्पन्न एएफसी सोलिडारिटी कप फुटबल प्रतियोगिताको उपाधि विजेता टोलीलाई नेपाल फुटबल संघ एन्फाले भव्य स्वागत गरेको छ ।
बुधबार साँझ विमानस्थल आइपुगेको टोलीलाई एन्फाले त्रिभुवन अन्तर्राष्ट्रिय विमानस्थलबाट र्याली सहित गौशाला-बत्तिसपुतली -मैतीदेवी-पुतलीसडक -घन्टाघर- सहिद ढोका- नयाँ सडक-दरबारमार्ग-त्रिपुरेश्वर-थापाथली-कुपन्डोल-पुल्चोक-मङ्गलबजार-ग्वार्को हुँदै एन्फा कम्प्लेक्स पुर्याएको थियो ।
विजेता टोलीलाई सरकारले जनही तीन तीन लाख दिने निर्णय गरेको छ । प्रतियोगिता अन्तर्गत नेपालले सेमिफाइनलमा लाओसलाई पेनाल्टी सुटआउटमा ३-० गोलअन्तरले पराजित गर्दै फाइनल यात्रा तय गरेको थियो । फाइनलमा भने मकाउलाई १-० को गोलअन्तरले हराउँदै उपाधि जितेको हो ।
यससँगै नेपालले एक वर्षमा लगातार तीन उपाधि जितेको छ । गत वर्ष माघमा बङ्गलादेशमा भएको बङ्गबन्धु गोल्डकप जितेको नेपाल त्यसको एक महिनापछि भारतमा सम्पन्न दक्षिण एसियाली खेलकुद सागमा पनि विजेता बन्यो । ती दुवै प्रतियोगिता विश्व फुटबल महासङ्घ फिफाले मान्यता दिएको सिनियर स्तरको फुटबल थिएन । बङ्गबन्धु कपको फाइनलमा नेपालले बहराइनको २३ वर्षमुनि यु-२३ को टोलीलाई हराएको थियो ।
तस्बिर: विकास कार्की