वीरगन्जः कार्यकर्ताले मधेसमा नेपाली कांग्रेसलाई मधेसविरोधी पार्टीका रूपमा स्थापित हुँदै गएको भन्दै चिन्ता व्यक्त गरेका छन् । मधेसलाई कांग्रेसको गढ मानिए पनि पछिल्लो समय नेतृत्वले बेवास्ता गर्दै आएको उनीहरूको गुनासो छ ।
वरिष्ठ नेता रामचन्द्र पौडेलको प्रमुख आतिथ्यमा वीरगन्जमा बिहीबार नेपाली कांग्रेस पर्साले आयोजना गरेको कार्यकर्ता भेलामा सहभागी कार्यकर्ताले मधेसीको भावनालाई पार्टी नेतृत्वले कुल्चिएर हिँडेकाले कांग्रेस कमजोर बन्दै गएको बताए ।
संविधान संशोधन गरेर मधेसका मुद्दा सम्बोधन गर्न पार्टी नेतृत्वसँग उनीहरूले माग गरे । कार्यक्रममा वीरगन्ज अलौंका कांग्रेस कार्यकर्ता शिवहरि लामिछानेले भने, ‘मधेसका मुद्दाको सवालमा कांग्रेसको एजेन्डा के छ ? पार्टी नेतृत्वले स्पष्ट पार्नुपर्छ । मधेसी दलले उठाएका कुन माग जायज छन्, कुन नाजायज छन् ? भनिदिनुपर्यो ।'
पर्सा बेलवाका कार्यकर्ता नवलकिशोर झाले पनि खोक्रो रवैयाका कारण कांग्रेसप्रति मधेसका युवापुस्ताको आकर्षण घटदै गएको बताए । नेतृत्वले मधेस र मधेसीका मुद्दामा दोधारे चरित्र देखाउँदै आएका कारण कांगे्रस मधेसविरोधी दलका रूपमा स्थापित हुँदै गएको अर्का कार्यकर्ता मनोजकुमार महतोको भनाइ छ ।
कार्यक्रममा कार्यकर्ताको गुनासो सुनेपछि वरिष्ठ नेता पौडेलले कांग्रेसले मधेसलाई उपेक्षा नगरेको प्रतिक्रिया दिए । ‘मधेस कांग्रेसको गढ हो, मधेसको पार्टी कांग्रेस हो', उनले भने । तराई–मधेसका जनताको समस्या सम्बोधन गर्न आफू अहिले मधेसमा आएको उनको भनाइ छ ।
प्रतिक्रिया दिनुहोस !
