काठमाडौः मासिक सिने पत्रिका कामनाले प्रकाशनको तीन दशक लामो यात्रा पार गरेको अवसरमा ‘लक्स कामना अवार्डस् २०७३’ आयोजना गर्ने भएको छ ।
सीजी इन्टरटेनमेन्टको सहकार्यमा २०७१ सालबाट थालनी भएको सीजी कामना फिल्म अवार्डस्को दोस्रो संस्करण मंसिर १८ गते शनिबार भद्रकालीस्थित आर्मी अफिसर्स क्लबमा हुनेछ । यसवर्षबाट बहुराष्ट्रिय कम्पनी युनिलिभिर नेपालको उत्पादक लक्स साबुनको पनि सहभागीता सुरु भएको आयोजकले जनाएको छ ।
कार्यक्रममा यस वर्ष ३२ विधामा अवार्ड प्रदान गरिने भएको छ । अवार्डको यस संस्करणमा चलचित्र नाइँ नभन्नु ल ४ सर्वाधिक २१ विधामा मनोनयनमा परेको छ । त्यसैगरी चलचित्र प्रेमगीत १९, क्लासिक १७, ड्रिम्स १६, वडा नम्बर—६ १४ र पशुपतिप्रसाद १२ विधामा मनोनयनमा परेको छ ।
लक्सको सहभागितासँगै एक नयाँ विधा लक्स पपुलर च्वाइस अवार्ड थपिएको छ । यो विधामा केकी अधिकारी, नम्रता श्रेष्ठ, सामाज्ञ्रीराज्यलक्ष्मी शाह, प्रियंका कार्की र सृष्टि श्रेष्ठबीच प्रतिस्पर्धा चलिरहेको छ । सर्वाधिक एसएमएस प्राप्त गर्ने अभिनेत्रीले अवार्ड हासिल गर्नेछिन् ।
अन्य १८ लोकप्रिय विधामा पनि एसएमएस भोटिङ चलिरहेको छ । ती १८ विधामा ९० प्रतिशत अंक निर्णायक मण्डल र १० प्रतिशत अंक एसएमएस भोटिङबाट मिलाई विजेता चयन गरिनेछ ।
अवार्ड आयोजक समितिका निर्देशक तथा सीजी इन्टरटेनमेन्टका अध्यक्ष वसन्त चौधरीले कामना फिल्म अवार्डस् एक दिन नेपाली चलचित्र क्षेत्रको मानक अवार्ड हुने विश्वास व्यक्त गरे ।
प्रतिक्रिया दिनुहोस !
