भक्तपुरः भक्तपुरको गठ्ठाघरमा बा१ज ९५३६ नंको माइक्रोबसले आज बा२ज १५४७ नंको ट्याक्सीलाई ठक्कर दिँदा ट्याक्सी चालकको मृत्यु भएको छ ।
दुर्घटनामा ट्याक्सी चालक भीमेश्वर नगरपालिका–३ दोलखाका ३३ वर्षीय दिनेश केसीको मृत्यु भएको महानगरीय ट्राफिक प्रहरी प्रभाग गठ्ठाघरका प्रमुख वसन्त खातीले जानकारी दिए ।
दुर्घटनामा परेर माइक्रोबसमा सवार आठ जना घाइते भएकामा चार जना उपचारपछि घर फर्केको र अन्य चार जनाको नागरिक अस्पताल गठ्ठाघर र मध्यपुर अस्पताल थिमीमा उपचार भइरहेको छ । माइक्रोबस चालक भने फरार भएकाले खोजी भइरहेको प्रहरीले जनाएको छ ।
दुई पक्राउ
गत साउन ६ गते राति दुई जनालाई खुकुरी प्रहार गरेर घाइते बनाई फरार भएका दुई जनालाई प्रहरीले आज पक्राउ गरेको छ ।
पक्राउ पर्नेमा भक्तपुर नगरपालिका–५ बस्ने १८ वर्षीय खम्पा भनिने किसन ठुसा र काभ्रेपलाञ्चोक सस्र्युँखर्क–२ स्थायी घर भई हाल भक्तपुर–१० बस्ने १८ वर्षीय सुनिल तामाङ छन् ।
भक्तपुर नपा–४ महालक्ष्मी स्थान बस्ने २१ वर्षीय किरण सिमाछ्वा र सोही ठाउँ बस्ने १८ वर्षीय सुरज मारिखुलाई खुकुरी प्रहार गरी घाइते बनाई फरार रहेका उनीहरुलाई प्रहरीले भक्तपुर– ४ कमलविनायकबाट पक्राउ गरेको हो ।
अभियुक्तलाई ज्यान मार्ने उद्योग मुद्दामा अनुसन्धानका लागि म्याद थप गरिएको महानगरीय प्रहरी परिसर भक्तपुरका प्रहरी नायब उपरीक्षक कृष्ण प्रसार्इंले जानकारी दिनुभयो । रासस
प्रतिक्रिया दिनुहोस !
