हिरोले भित्र्यायो ‘स्मार्ट बाइक'

काठमाडौंः नेपालको दुई पांग्रे बजारमा तीनवटा नयाँ मोडल प्रवेश गरेका छन् । हिरो मोटोकर्पले तीनवटा स्मार्ट बाइक भिœयाएको हो । नयाँ मोडल स्प्लेन्डर आईस्मार्ट–११०, न्यु अचिभर–१५० र नयाँ सुपर स्प्लेन्डर-१२५ हुन् । सोमबार काठमाडौंमा भव्य समारोहबीच तीनवटा मोडल सार्वजनिक गरियो । नेपाल जनरल मार्केटिङ (एनजीएम)ले नेपालमा हिरो बाइक तथा स्कुटर बिक्री गर्दै आएको छ ।

तीनवटै मोडलमा आईथ्रीएस प्रविधि प्रयोग गरिएको छ । यो प्रविधियुक्त बाइक स्टार्ट गरेर नचलाई न्युटलमा राखेको पाँच सेकेन्डमा आफैं अफ हुने र क्लच लिएपछि स्टार्ट हुने हुन्छ । एकछिन बाइक रोकर कुदाउँदा इञ्जिन ‘अन अफ' गरिरहनुपर्ने झन्झट हुँदैन । ट्राफिक जाममा बाइक कुदाउन सजिलो हुन्छ । यसअघि नेपाल भित्रिएको सय सिसीको स्प्लेन्डर आईस्मार्ट बाइकले ग्राहकको विश्वास जित्न सकेको थियो । यसैको नयाँ भर्सन स्प्लेन्डर आइस्मार्ट–११० भित्रिएको छ ।

नयाँ मोडलले पनि नेपालीको विश्वास जित्ने एनजीएमका अध्यक्ष अभिक ज्योतिले बताए । नेपालमा हिरो बाइक र स्कुटर लोकप्रिय छन् । कम्पनीले पनि ग्राहकको मागअनुसारका मोडल प्रस्तुत गरिरहेको छ । हिरोका उत्पादन भरपर्दो, युवा ऊर्जायुक्त र प्रभावकारी रहेको कम्पनीको दाबी छ । कम्पनीले युवादेखि बुढासम्म सबैलाई सुहाउने बाइक ल्याएको छ ।

स्प्लेन्डर आईस्मार्ट

स्प्लेन्डर आइस्मार्ट-११० भारतको जयपुरस्थित हिरोको सेन्टर अभ इनोभेसन टेक्नोलोजीमा डिजाइन गरेर बनाइएको पहिलो बाइक हो । यो बाइकमा नयाँ चेसिस र फ्रेम प्रयोग गरिएको छ । यो बाइक इन्धन किफायती पनि छ । यसमा नयाँ बीएस-४ मापदण्डको ११० सीसी टर्क अन डिमान्ड (टर्क इञ्जिन), फोर स्ट्रोक, एयरकुल्ड इञ्जिनलगायतका विशेषता छन् । यो बाइक ७.४५ सेकेन्डमा शून्यबाट ६० किमि प्रतिघन्टाको गतिमा कुदन सक्ने कम्पनीको दाबी छ ।

बाइकको इञ्जिनमा आईथ्रीएस प्रविधि जडान गरिएको छ । बाइकको सिट लामो भएकाले यात्रा सजिलो हुन्छ । नयाँ स्पिडोमिटर नयाँ विशेषता हो । यसमा रहेको सर्भिस ड्यु इन्डिकेटरले समय समयमा गर्नुपर्ने बाइकको मर्मत सम्भारबारे सम्झाउँछ । यो बाइक चाँदी र कालो, रातो र कालो, निलो र कालो तथा स्पोर्टस् रेडमा उपलब्ध छ । यसमा ८.५ लिटर क्षमताको इन्धन ट्यांकी छ । यसको मूल्य १ लाख ६६ हजार रुपैयाँ छ ।
विशेषता
मूल्यः १ लाख ६६ हजार
इन्जिनः ११० सीसी
इन्धन ट्यांकीः ८.५ लिटर

न्यु अचिभर

यो बाइक नयाँ पुस्तालाई ध्यानमा राखेर उत्पादन गरिएको हो । यसले उत्कृष्ट शैली र साहसी ढाँचालाई मूर्तरुप दिएको छ । यसको कार्यसम्पादन पनि परिस्कृत छ । १५० सीसी क्षमताको बाइकमा आईथ्रीएस प्रविधि छ । यसमा रहेको बीएस-४ मापदण्डको १५० सीसी टर्क अन डिमान्ड अर्थात टड इन्जिनले बाइक सञ्चालन गर्नेछ । नयाँ युवा पुस्ता लक्षित अचिभर आकर्षक डिजाइनमा छ । बाइकमा सुरक्षा र उपयोगिता सम्बन्धी धेरै विशेषता छन् । यसले उत्कृष्ट यात्राको अनुभूति दिनेछ ।

अचिभर पाँच सेकेन्डमा शून्यबाट ६० किलोमिटर प्रतिघन्टाको दरमा कुद्न सक्छ । बाइकमा नयाँ हेडलाइट, साइड स्टयान्ड इन्डिकेटर, नयाँ किसिमको सिट, ठूलो भाइजर, मोटो फेन्डरलगायतका फिचर छन् । अटोमेटिक हेडल्याम्प अन बाइकको नौलो विशेषता हो ।

यही विशेषताले अँध्यारोमा पनि धेरै परसम्म देख्न सकिन्छ । मधुरो प्रकाशमा पनि चालकलाई सुरक्षित रहन सहयोग गर्छ । डिस्क ब्रेकिङ सिस्टम यसको अर्को विशेषता हो । १३ लिटरको फ्युल ट्यांक, मफ्लर कभर, टेल लाइटले पनि बाइकलाई अझ उत्कृष्ट बनाएको छ । नेपालमा अचिभरको मूल्य दुई लाख तीन हजार रुपैयाँ तोकिएको छ ।

विशेषता
मूल्यः २ लाख ३ हजार
इन्जिनः १५० सीसी
इन्धन ट्यांकीः १३ लिटर

सुपर स्प्लेन्डर

नेपालमा सुपर स्प्लेन्डर लोकप्रिय छ । कम्पनीले सुपर स्प्लेन्डरमा आईथ्रीएस प्रविधि जडान गरेर नयाँ भर्सन ल्याएको छ । यो बाइक इन्धन किफायती छ । सहरी सडकमा यात्रा गर्न सुपर स्प्लिन्डर उत्कृष्ट रहेको कम्पनीको दाबी छ । १२५ सीसी क्षमताको बाइक अप्ठ्यारो सडकमा पनि उत्कृष्ट सन्तुलनका साथ हुँइकिन्छ । यसमा रहेको सर्भिस ड्यु इन्डिकेटरले समय समयमा गर्नुपर्ने मर्मत सम्भारबारे जानकारी गराउँछ ।

सुपर स्प्लिन्डरको बडीमा विभिन्न आकृति कँुदिएको छ । यसले बाइक आकर्षक देखिन्छ । यसमा १३ लिटरको इन्धन ट्यांकी छ । नेपाली बजारमा यसको मूल्य १ लाख ७६ हजार रुपैयाँ तोकिएको छ ।

विशेषता
मूल्यः १ लाख ७६ हजार
इन्जिनः १२५ सीसी
इन्धन ट्यांकीः १३

भारतको नयाँ दिल्लीमा प्रधान कार्यालय रहेको हिरो मोटोकर्पले एसिया, अफ्रिका, दक्षिण र मध्य अमेरिकाका ३४ देशमा आफ्ना उत्पादन बिक्री वितरण गर्दै आएको छ । विदेशी भूमिमा पहिलो पटक कोलम्बियास्थित प्लान्टबाट पनि बाइक उत्पादन सुरु भइसकेको कम्पनीले जनाएको छ ।

हिरोको देशबाहिर दोस्रो कारखाना यही वर्षदेखि बंगलादेशमा सञ्चालन हुँदैछ । भारतमा चारवटा कारखाना सञ्चालनमा छन् । एक वर्षमा यी कारखानाबाट ८० लाख थानभन्दा बढी हिरो बाइक तथा स्कुटर उत्पादन हुन्छन् ।