कानुनमन्त्रीले भारतको संविधानको प्रशंसा गर्दै भनेः संघीय संरचनामा उपयोगी
मंसिर १०, २०७३ शुक्रबार १९:३८:०
काठमाडौँ: कानुन, न्याय तथा संसदीय मामिलामन्त्री अजयशङ्कर नायकले भारतीय संविधान सङ्घीय संरचनामा निकै उपयोगी भएको बताएका छन् ।
भारतको संविधान १२५औँ स्थापनाका अवसरमा नेपाल–भारत बिपी कोइराला फाउन्डेसनले गरेको कार्यक्रममा उनले भारतको संविधान मौलिक हक, न्यायिक स्वतन्त्रताका साथै सङ्घीय संरचनामा उपयोगी भएको बताए ।
विश्वकै ठूलो संविधानका रुपमा परिचित भारतको संविधान मौलिक र त्यहाँको जनताको भावना बुझ्ने खालको भएको उनको भनाइ छ ।
नेपालका लागि भारतीय राजदूत रणजित रायले भारतको संविधान निर्वाचित प्रतिनिधिले नबनाएको भए तापनि कठोर नभई लचिलो भएको बताए ।
उनले नेपाल-भारतबीच धार्मिक तथा सांस्कृतिक रुपमा नजिकको सम्बन्ध रहेको उल्लेख गरे ।
सर्वोच्च अदालतका पूर्व न्यायाधीश गिरीशचन्द्रलालले भारतको संविधानमा शक्ति पृथकीकरण र सन्तुलनको दृष्टिकोणले निकै उपयुक्त भएको उल्लेख गरे ।
प्रा डा सूर्य ढुङ्गेल, डा निश्चलनाथ पाण्डेले भारतको संविधान सङ्घीय संरचनामा निकै राम्रो देखिएको र ठूलो संविधान भइकन पनि प्रभावकारी कार्यान्वयन हुनु अत्यन्तै राम्रो विशेषता भएको चर्चा गरे । रासस
प्रतिक्रिया दिनुहोस !
