नेपाल- भारत बैठक आजः परियोजना कार्यान्वयनमा देखिएका समस्याबारे छलफल हुने
काठमाडौः नेपाल-भारत द्विपक्षिय सहयोगका परियोजना कार्यान्वयनमा देखिएका बिद्यमान समस्या हल गर्न गठित अनुगमन संयन्त्रको पहिलो बैठक आज मंगलबार काठमाडौमा बस्दैछ ।
परराष्ट्र मन्त्रालय सिंहदरबारमा बस्ने द्विपक्षिय अनुगमन संयन्त्रको उक्त बैठकमा नेपालका परराष्ट्र सचिव शंकर दास बैरागी र भारतीय राजदूत रंजित रेले आ-आफ्ना टोलीको नेतृत्व गर्नेछन् ।
संयन्त्रमा नेपालका तर्फबाट परराष्ट्र, भौतिक योजना, अर्थ, वाणिज्य र पर्यटन मन्त्रालयका उच्च अधिकारीहरु सहभागि हुने भएका छन् । त्यस्तै भारतका तर्फबाट भारतीय दूतावासका उपप्रमुख, आर्थिक मामिला हेर्ने अधिकारी, पुर्ननिर्माण हुर्ने अधिकारी लगायत रहने भएका छन् ।
दुई महिना अघि सम्पन्न प्रधानमन्त्री पुष्पकमल दाहालको भारतको राजकीय भ्रमणका क्रममा भएको सहमति अनुशार गठन भएको उक्त संयन्त्रको पहिलो बैठक बस्न लागेको हो ।
बैठकमा भारतीय सहयोगमा नेपालमा संचालित माथिल्लो कर्णाली र अरुण ते श्रो जलबिद्युत् आयोजना निर्माणको बिषयले प्रवेश पाउने भएको छ ।
‘द्विपक्षिय सहकार्यका परियोजनाको कार्यान्वयनमा देखिएका समस्या र तिनको समाधान गरी प्रभावकारी कार्यान्वयनमा कसरी अघि बढ्ने भन्ने बिषयमा छलफल केन्द्रित रहनेछ’ सचिव बैरागीले अन्नपूर्णसँग भने ।
भारतीय लगानीमा संचालिन दर्जनौँ परियोजनाहरु बर्षौँदेखि निर्माण सम्पन्न हुन सकेका छैनन् । पूर्व प्रधानमन्त्री केपी शर्मा ओली र अहिलेका प्रधानमन्त्री दाहालको भारत भ्रमणका क्रममा भएका सहमतिलाई कार्यान्वयनमा लैजाने, भारतले भूकम्प पछिको पुर्ननिर्माण परियोजनामा दिएको एक बिलियन अमेरिकी डलरको सहायता कार्यान्वयनका बिषयमा पनि बैठकमा छलफल हुने अधिकारीहरुले बताए ।
द्विपक्षिय आर्थिक तथा विकास सहकार्य अन्र्तगत भारतीय लगानीमा उर्जा, जलस्रोत, पूर्वाधार, पर्यटन लगायत क्षेत्रमा संचालित बिद्यमान परियोजनाहरुको अनुमगन गर्न, परियोजनामा देखिएका समस्या संबोधन गर्न र तिनको समय बद्द रुपमा छिटो हल गर्न एक द्विपक्षिय संयन्त्र गठन गर्ने नेपाल र भारतबीच सहमति भएको थियो ।
भ्रमण पछि जारी सँयुक्त वक्तव्यको १३ औँ नम्बर बुंदामा दुवै देशका प्रधानमन्त्रीहरुको निर्देशनअनुशार अनुगमन संयन्त्र गठन गर्ने सहमति भएको उल्लेख छ ।