भँगेरो रेडियोको स्टेसन म्यानेजर!
![भँगेरो रेडियोको स्टेसन म्यानेजर!](https://annapurnapost.prixacdn.net/media/albums/bird-583d382be54719.20051891_48gSmh7jW6.jpg)
मंगलसेन: रेडियोको स्टेसन म्यानेजर पदमा भँगेरो नियुक्त भएको छ । अछामको पहिलो सामुदायिक रेडियो रामारोशन एफएम ९२ मेगाहर्जले रेडियोको स्टेसन म्यानेजरमा भँगेरोलाई नियुक्त गरेको हो ।
रेडियो रामारोशन एफएमको मंगलसेन नगरपालिका–६ ठुलासैनस्थित प्रसारण केन्द्रको भवन परिसरमा एक वर्षदेखि नियमित बसिरहेको भँगेरोलाई सोमबारबाट लागू हुने गरी मानार्थ स्टेसन म्यानेजर पदमा नियुक्त गरिएको कार्यकारी निर्देशक वेदप्रकाश तिमल्सेनाले जानकारी दिए ।
लोपन्मुख अवस्थामा रहेकाले पन्छीको संरक्षणका लागि दबाब पुगोस् भन्ने उद्देश्यले भँगेरालाई मानार्थ स्टेसन म्यानेजरमा नियुक्त गरिएको रेडियो सञ्चालक समितिले जानकारी दिएको छ । रेडियोको स्टुडियो रहेको घरमा गौंथलीले लगाएको गुँड कब्जा गरी एक्लो भँगेरो बसिरहेको छ ।
सोमबार बसेको रेडियो सञ्चालक समितिको बैठकले भँगेरोलाई मानार्थ स्टेसन म्यानेजर पदमा नियुक्त गर्ने निर्णय गरेको तिमल्सेनाले जानकारी दिए । बासस्थानको विनाश, विषादीको प्रयोग तथा सञ्चार उपकरणको विकिरणजस्ता कारणले भँगेरालगायत प्रकृतिका कुचिकार गिद्ध, रामारोशन क्षेत्रमा पाइने डाँफे, खरमजुरलगायतका पन्छी संकटमा परेका छन् ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)