काठमाडौ: सङ्घीय मामिला तथा स्थानीय विकासमन्त्री हितराज पाण्डेले चीनबिरोधी गतिबिधी हुन नदिने प्रतिबद्दता जनाएका छन् ।
नेपाल भ्रमणमो रहेको चीनको साङ्सी प्रान्तका उपगर्भनर याओ यिनलियाङ नेतृत्वको छ सदस्यीय प्रतिनिधिमण्डलसंग मंगलबार भएको भेटमा पाण्डेले नेपालमा चीन विरोधी कुनै पनि गतिविधि हुन नदिइने बताए । मन्त्री पाण्डेले नेपाल सरकार ‘एक चीन नीति’ प्रति पूर्ण प्रतिबद्ध रहेको बताएको पाण्डेको सचिवालयले प्रेस विज्ञप्तिमा जनाएको छ ।
मन्त्री पाण्डेले विसं २०६६ सालमा आफूले साङसी प्रान्तको भ्रमण गरेको स्मरण गर्दै उच्चस्तरको यस भ्रमणले दुई देशबीचको सम्बन्ध अझ विकसित हुने बताए ।
भूकम्पबाट प्रभावितको उद्धार, राहत र पुनःनिर्माणमा चीनले गरेको सहायताप्रति धन्यवाद प्रकट गर्दै पाण्डेले नेपालको विकासक्रममा चीनको सहयोग सरहानीय रहेको बताए ।
भेटमा चिनियाँ प्रतिनिधीमण्डलले साङ्सी प्रान्त र भगवान् गौतमबुद्धको जन्मस्थल लुम्बिनीसँग गहिरो सम्बन्ध रहेको बताउँदै भैरहवा विमानस्थलको निर्माण सम्पन्न भएपछि साङ्सी प्रान्तको लुम्बिनीसँगको सीधा हवाई सम्पर्क स्थापित हुने र यसबाट ठूलो मात्रामा चिनियाँ पर्यटक लुम्बिनी भित्र्ने सक्ने बताएको थियो ।
लुम्बिनी र साङ्सीबीच सिधा हवाई सम्पर्क हुन नसक्दा पर्यटन प्रवद्र्धनमा समेत समस्या आएको उल्लेख गर्दै प्रतिनिधिमण्डलले भैरहवा विमानस्थल निर्माणमा समस्या देखिए सरकारले समाधान गरिदिने अपेक्षा राखेको पाण्डेको सचिवालयले जनाएको छ ।
सो अवसरमा मन्त्री पाण्डेले भैरहवा र पोखरा क्षेत्रीय अन्तर्राष्ट्रिय विमानस्थलको निर्माण समयमै सम्पन्न हुने विश्वास व्यक्त गर्दै सरकारले विमानस्थल निर्माणमा कुनै बाधा व्यवधान आउन नदिने प्रतिबद्धता व्यक्त गरे । साङ्सी चीनमा सबैभन्दा बढी बौद्धमार्गी रहेको प्रान्त हो ।
प्रतिक्रिया दिनुहोस !
