संविधान संशोधन प्रस्तावको विरोधमा उल्टो जुलुस
गुल्मीः सरकारले संविधान संसोधन प्रस्तावमा ५ नम्बर प्रदेशका पहाडी जिल्ला टुक्राएको विरोधमा गुल्मीमा आन्दोलन अझ सशक्त बन्दै गएको छ । सातौं दिन आन्दोलनकारीले सदरमुकाम तम्घासमा उल्टो जुलुस प्रर्दशन गरेका छन् ।
सरकार संविधान कार्यान्वयन गर्नुको सट्टा संविधान संशोधन तर्फ लागेको विरोधमा खबरदारी लागि उल्टो जुलुस गरेको आन्दोलनकारीले बताएका छन् ।
उल्टो जुलुसमा सरकार, प्रतिपक्ष र सर्वसाधारण र स्थानीय सबै सहभागी थिए । जनताको भावना विपरित ल्याइएको सीमांकन हेरफेर फिर्ता नल्याएसम्म आन्दोलन जारी रहेने संयुक्त आन्दोलन समितिका अध्यक्ष भुवन प्रसाद श्रेष्ठले बताए ।
सरकारले संविधान संशोधनमा पहाडी जिल्ला टुक्राएको विरोधमा ७ दिनदेखि गुल्मी अनिश्चितकालिन बन्द हुदै आएको छ । लगातारको बन्दबाट गुल्मीको जनजीवन कष्टकर बन्दै गएको छ ।
बन्दको अवज्ञा गरेको भन्दै गुल्मीको विभिन्न ठाउँबाट जिप, मोटसाइकल र बस डेढ दर्जन सवारी साधन नियन्त्रणमा लिएका छन् ।
आन्दोलनलाई थप अराजक बन्न नदिन स्वयम्सेवक दल गठन गरिएको छ । आन्दोलन अवधिभर कुनै पनि राजनीतीक दलको झण्डा नबोकी राष्ट्रिय झण्डा प्रयोग गर्ने निर्णय आन्दोलन परिचालन कमिटीको छ ।
विद्यालयमा अर्धबार्षिक परीक्षा संचालन भएकाले थप समस्या नहोस् भन्नका लागि शैक्षिक संस्था बन्द नगरिएको संयुक्त आन्दोलन परिचालन कमिटीका सदस्य मधुकृष्ण पन्तले जानकारी दिए ।
प्रतिक्रिया दिनुहोस !
