संविधान संशोधन प्रस्ताव फिर्ताको माग गर्दै बालुवाटारमा प्रदर्शन
मंसिर २२, २०७३ बुधबार १२:५:०
काठमाडौः आन्दोलनरत विद्यार्थी तथा युवा संगठनहरुले बुधबार प्रधानमन्त्री निवास वालुवाटारअगाडि प्रदर्शन गरेका छन् । संविधान संशोधन प्रस्ताव फिर्ताको माग गर्दै उनीहरुले बालुवाटार घेराउ गरेका हुन् ।
संयुक्त विद्यार्थी तथा युवाहरुले संशोधन प्रस्तावले देशलाई विखण्डनतिर लैजान थालेको भन्दै संविधान संशोधन फिर्ताको माग गरेका हुन् ।
‘देश टुक्र्याउन पाइँदैन, संशोधन प्रस्ताव मान्दैनौँ’, ‘राष्ट्रघाती षडयन्त्रको भण्डाफोर गरौँ’ भन्ने नारा लगाउँदै उनीहरुले बालुवाटारमा प्रदर्शन गरेका थिए । प्रदर्शनका क्रममा प्रहरीसँग सामान्य विवाद भएको विद्यार्थी नेता माधव पन्तले जानकारी दिए । नेता पन्तका अनुसार ९ बजेदेखि ११ बजेसम्म प्रधानमन्त्री निवास बालुवाटारमा प्रदर्शन भएको थियो ।
प्रदर्शनपछि सम्बोधन गर्दै युवा संघका अध्यक्ष राजीव पहारीले आन्दोलनले प्रचण्ड सरकार हल्लिएको बताए । ‘सरकारले संशोधन फिर्ता नलिदाँसम्म आन्दोलन जारी रहन्छ’ उनले भने ।
अनेरास्ववियुका उपाध्यक्ष महेश बर्तौलाले संशोधन प्रस्तावले देशलाई विखण्डनतिर लैजाने भएकाले फिर्ता गर्न माग गरेका थिए ।
सरकारले संविधान संशोधन प्रस्ताव दर्ता गरेसँगै संयुक्त युवा विद्यार्थीले फिर्ताको माग गर्दै प्रदर्शन गर्दै आएका छन् ।
प्रदर्शनमा विपक्षी दलका भ्रातृ सङ्गठन, युवा सङ्घ नेपाल, अनेरास्ववियु, नेपाल क्रान्तिकारी विद्यार्थी सङ्गठन, प्रगतिशील युवा सङ्घ, अखिल नेपाल युवक सङ्घ तथा अखिल छैटौँको सहभागिता रहेको थियो ।
संविधान संशोधनको विरोधस्वरुप भोली बिहीबार ३ बजे बानेश्वरमा कविता वाचन गरिने अनेरास्ववियुका प्रवक्ता आरसी लामिछानेले जानकारी दिए ।
प्रतिक्रिया दिनुहोस !
