संसद्मा चित्रबहादुर केसीको प्रश्नः संघीयताको डिजाइन कताबाट आयो ?
मंसिर २२, २०७३ बुधबार १५:२१:०
काठमाडौंः राष्ट्रिय जनमोर्चाका अध्यक्ष चित्रबहादुर केसीले संघीयताको डिजाइन कताबाट आएको भन्दै व्यवस्थापिका संसद्मा प्रश्न गरेका छन् ।
बुधबारको संसद् बैठकमा बोल्दै केसीले संघीयताको डिजाइन सानोतिनो नभएकाले संविधान संशोधन विधेयक फिर्ता नभएसम्म आन्दोलन र विरोध फिर्ता नहुने दाबी गरे । ‘संघीयताको डिजाइन कताबाट आयो ?’, केसीले प्रश्न गर्दे भने, ‘सानोतिनो डिजाइनमा सङ्घीयता प्रवेश गरेको छैन, संशोधन विधेयक फिर्ता नभएसम्म आन्दोलन र विरोध निरन्तर रहन्छ ।’
केसीले राष्ट्रिय, राष्ट्रियता र अखण्डतालाई अप्ठ्यारो पार्ने हिसाबले सरकारले संविधान संशोधन प्रस्ताव ल्याएको आरोप लगाए ।
केसीले थपे, ‘नागरिकता, भाषा आयोग, प्रदेशको सीमाङ्कन र राष्ट्रियसभामा प्रतिनिधित्वजस्ता कुरा सामेल गरेर ल्याइएको संविधान संशोधन विधेयक फिर्ता नलिएसम्म सदन चल्न सक्दैन ।’
केसीले जनताको भावनाविपरित सरकारले ५ नम्बर प्रदेश विभाजन गरेको आरोप लगाए । ‘जनताको भावनाविपरीत ५ नम्बर प्रदेशबाट पहाडी जिल्ला विभाजन गर्ने अनि, विगतमै छिनोफानो भएको विषयलाई पुनः बल्झाउने गरी भाषा आयोग गठन गर्नेजस्ता गलत कार्य भएका छन्’, केसीले भने ।
सुरुदेखि नै संघीयताको विरोध गर्दै आएका नेता केसीले संघीयताले देशलाई अप्ठेरो पार्छ भन्ने कुरा आफू र आफनो दलले भन्दै आएको स्मरण गराउँदै थपे, ‘सङ्घीयताको नाममा विगतमा २ नम्बर प्रदेशलाई पहाडबाट अलग गराउनु ठीक थिएन ।’
‘झण्डै ५१ प्रतिशत जनता भएको ठाउँमा एउटामात्र प्रदेश हुने अनि ४९ प्रतिशत भएकोमा अनेकौँ प्रदेश बनाउनुपर्छ भन्ने कुरा कसरी सम्भव छ ?’ केसीले प्रश्न गरे ।
प्रमुख प्रतिपक्षी दल एमालेको अवरोधका कारण बुधबारको व्यवस्थापिका संसद् बैठक समेत अवरुद्ध भएको छ । सभामुखले बैठक सञ्चालनमा सहयोग गर्न पटकपटक अग्रह गरे पनि एमाले सांसदले आफू बसेको कुर्सीबाट उठेर बैठक अवरुद्ध गरेका हुन् । सांसदको अर्को बैठक मङिसर २४ गते अपराह्न ३ बजे बस्नेगरी स्थगित भएको छ ।
प्रतिक्रिया दिनुहोस !
