अम्माको अधुरो सपना 

सन् १९९९ जनवरी २१ मा एनडी टीभीमा प्रसारित जयललिताको विचारले धेरैलाई अचम्ममा पार्यो । आफ्नो सपना र चाहनाको कुरा गर्दै उनले ‘अबको मेरो सपना आफूले चाहेअनुसार जिन्दगी बिताउने हो ।

जहाँ मान्छेलाई भेट्न नपरोस् । टेलिफोन कल सुन्न नपरोस्, भाषण दिन नपरोस् । किताब, गीतसंगीत र मैले पालेको जनावरसँग खुसी रहन सकुँ । दुनियाँको पागलपनबाट टाढा बस्न सकुँ । मलाइँ खेती मनपर्छ’ भनेकी थिइनँ ।

त्यसबेला उनले जस्तो विचार प्रवाह गरे पनि त्योअनुसार उनको जीवन चल्न सकेन । मान्छेको भीड, टेलिफोन कल, भाषणबाट उनी अलग हुन सकिनन् । किताब, गीतसंगीत, उनले पालेका जनावरसँगमात्रै उनी सीमित रहन पाइनन् ।

चाहे चलचित्र क्षेत्रमा हुँदा होस् वा राजनीति । आमाको कारण चलचित्र क्षेत्रमा आएकी जयललिताको चाहना थियो वकिल बन्ने । आमा थिएटर एक्टर भएकाले उनी १५ वर्षकै उमेरमा अभिनयमा लागिन् । सन् १९६० देखि १९९२ सम्म बलिउडमा राज गरिन् । जयललिता अभिनीत पहिलो चलचित्र ‘भेन्निरा आदाइ’ हिट भएपछि उनले कहिल्यै पछाडि फर्केर हेर्नु परेन ।

चलचित्रमा पाएको सफलताले अध्ययनलाई अगाडि बढाउन नसकेकाले उनको वकिल बन्ने सपना अधुरो हुन पुग्यो । आफ्नो पालामा उनी सफल र चर्चित रहिन् । सन् १९७३ मा एकसाथ तीनवटा फिल्मफेयर अवार्ड हात पारिन् ।

एक सय ४० को हाराहारी चलचित्रमा अभिनय गरेकी उनका अधिकांश चलचित्र हिट थिए । विभिन्न शास्त्रीय नृत्य, कत्थक, भरतनाट्यम, मोहिनी नाट्यम, मनिपुरी नाचदेखि शास्त्रीय संगीत, पश्चिमा शास्त्रीय पियानोमा समेत पोख्त भएकाले हरेक प्रकारका भूमिकामा उनी जमिन् । आफ्नो समयमा धेरै कमाइ गर्ने नायिकामा दरिएकी थिइन् उनी ।

स्कुलमा मेधावी छात्राको रूपमा चिनिएकी उनी कक्षा १० मा तमिलनाडु राज्यको उत्कृष्ट छात्रा बन्न सफल भइन् । जयललिताको नाम सर्वाधिक खोजीको नाम बनेको थियो त्यतिबेला । तमिल, तेलुगु, कन्नाडा भाषी चलचित्रमा ख्याति कमाएकी उनले बलिउडमा पनि काम गरिन् ।

अभिनयमा सफलताको स्वाद चाखिरहेकै बेला एमजी रामचन्द्रनका कारण उनी सन् १९८२ देखि राजनीतिमा प्रवेश गरिन् । एमजीलाई उनी राजनीतिक गुरु मान्थिन् । द्रबिड मुभमेन्टबाट राजनीति तानिएकी उनी द्रबिड पार्टीको प्रमुख बन्न सफल भइन् ।

राजनीतिमा लागेपछि उनको पहिलो भाषण ‘महिलाको गौरव’ सम्बन्धी थियो । जुन भाषण उनका राजनीति करिअरको कोशेढुंगा सावित भयो । बहुभाषी उनी अंग्रेजीमा पनि प्रखर थिइन् । सन् १९९१ मा पहिलो पटक तमिलनाडुको मुख्यमन्त्री बनेकी उनी पाँच पटक मुख्यमन्त्री बनेर कीर्तिमान कायम गरिन् ।

भारतमा ‘अम्मा’ उपनामले चिनिएकी उनले गरिबहरूका उद्धारका लागि विभिन्न कार्यक्रम ल्याएकी थिइन् । गरिबहरूको लागि रोजाइको पात्र बनेकी जयललितालाई क्रान्तिकारी महिलाको रूपमा हेरिन्थ्यो । चलचित्र र राजनीति दुवै क्षेत्रमा उत्तिकै सफल र चर्चित बनेकी उनको ६८ वर्षको उमेरमा गत ... बार निधन भएको हो ।
(एजेन्सीको सहयोगमा)