बोक्सी आरोपमा मलमूत्र कोच्याएर कुटपिट
बनेपा: बोक्सी आरोपमा मलमूत्र कोच्याएर कुटिएपछि ज्यान गुमाएकी काभ्रे सानो बाङ्थली ७ की ३३ वर्षीया लक्ष्मी परियारको मृत्युका बारेमा अनुसन्धान गर्न राष्ट्रिय मानवअधिकार आयोगको टोली काभ्रे आएको छ । आफन्तले दिएको किटानी जाहेरीअनुसार लक्ष्मीको हत्या गरेको आरोपमा शिक्षक हीरा लामा, साइँला तामाङ, लक्ष्मीका श्रीमान् मिलन परियार र काइँली तामाङलाई हिरासतमा राखिएको जानकारी जिल्ला प्रहरी कार्यालयले दिएको छ ।
काभ्रे प्रहरीले आइतबार पत्रकारसम्मेलन गरी घटनाबारे थप अनुसन्धान भइरहेको जानकारी गराएको छ । काभ्रेका प्रहरी प्रमुख एसपी सहकुलबहादुर थापाले कसकसले मलमूत्र कोच्यायो र कसले हत्या गर्यो भन्ने विषयमा अनुसन्धान जारी रहेको बताए । लक्ष्मीको शव सोही गाविस ७ स्थित रामबहादुर उप्रेतीको गोठमा फेलापरेको थियो । उनको शरीरमा निलडाम रहेको प्रहरीले जनाएको छ । आफन्तले लक्ष्मीलाई बोक्सीको आरोपमा मलमूत्र खुवाएर निर्घात कुटपिट गरी हत्या गरेको भन्दै किटानी जाहेरी दिएका थिए ।
मलमूत्र कोच्याएर कुटिएकी लक्ष्मीको शुक्रबार निधन भएको थियो । उनका छोरा सुमन र सासू विष्णुमाया दमिनीले लक्ष्मीलाई स्थानीय हीरा लामाले मलमूत्र खुवाई कुटपीट गरेर हत्या गरेको बताउँदै आएका छन् ।
'मर्ने बेलामा बुहारीले भनेको, मलाई कुटपिट गर्दै गुहु कोच्याए', मृतककी सासू विष्णुमायाले अन्नपूर्णसँग भनिन्, 'मृतक लक्ष्मी परियारलाई गत मंगलबार स्थानीय शिक्षक हीरा लामा र उनकी आमा काइँलीमाया लामाले बोक्सी भन्दै मलमूत्र कोच्याएर कुटपिट गरेका थिए ।' शिक्षक हीरा लामा र उनकी आमाले मंगलबार डोरीले बाँधेर मलमूत्र कोच्याई निर्घात कुटपिट गरेको विष्णुमायाले बताइन् । 'कुटपिटबाट गम्भीर घाइते भएकी बुहारीको शुक्रबार नै मृत्यु भयो', विष्णुमायाले बुहारीले भनेको सम्झिँदै भनिन्, 'आफूमाथि कुटपिट भएपछि प्रहरी कार्यालय चौबासमा निवेदन दिएका थियौं । विवाद र झमेला बढ्छ भनेपछि बिहीबार हामीलाई प्रहरी र स्थानीय भएर मिलापत्र गराइयो । तर शुक्रबार बुहारीको लास देख्नुपर्यो । हामीले पटकपटक कुटपिट भयो, दिसा खुवाइयो भन्यौं तर हाम्रो आवाज कसैले सुनेन । उल्टै मिल्नुपर्छ भने ।'
शिक्षक हीरा लामाको नेतृत्वमा आमालाई मंगलबार डोरीले बाँधेर मलमूत्र कोच्याई निर्घात कुटपिट गरिएको मृतक लक्ष्मीका दस वर्षीय छोरा सुमन नेपालीले बताए । 'मेरी ममीलाई कुटीकुटी मलमूत्र कोच्याएर मारियो । ममीलाई मंगलबार स्कुलको पोलमा बाँधेर कुट्दै दिसा खुवाएका थिए । शुक्रबार उहाँ मर्नुभयो', उनले थपे, 'म बच्चाको कुरा कसले सुन्ने ? बाटो रोकेर सरकी आमाले बोक्सी भन्नुभयो । त्यसपछि हीरा सरले समातेर मेरी ममीलाई नजिकै रहेको सूर्योदय माध्यमिक विद्यालयको खेल मैदानको पोलमा बाँधेपछि कपाल समाएर लडाउनुभयो र खुट्टाले थिच्नुभयो । त्यसपछि चिर्पटले टाउकोमा हान्नुभयो । सरले ममीको छातीमा चार लात्ती पनि हान्नुभयो । त्यही कारण शुक्रबार ममीको मृत्यु भयो ।'