‘अमेरिकी निर्वाचनमा रूसी हस्तक्षेप गलत’

मस्को: रूसको प्रशासनिक केन्द्र क्रेमलिनले वासिङटन पोस्टमा छापिएको अमेरिकी राष्ट्रपतिको निर्वाचनमा रूसको हस्तक्षेप रहेको भन्ने अमेरिकी गुप्चतर संस्था सिआइएको रिपोर्ट निराधार आरोपमात्रै भएको जनाएको छ ।

निर्वाचनका विषयमा रूसलाई जोडेर गरेको एउटै पनि आरोप बिल्कुलै आधारहीन भएको र यसलाई प्रमाणित गरेर देखाउन क्रेमलिन प्रवक्ता दिमित्री पेस्कोभले सञ्चारकर्मीसँग आग्रह गरे । ‘यी सबै आरोप बिल्कुल निराधार, अनुचित र अव्यवसायिक रहेकाले यसको वास्तविक अर्थमा कुनै तुक छैन’, पेस्कोभले भने ।

गत साता वासिङटन पोस्टमा प्रकाशित एक समाचारमा सन् २०१६ मा रूसले साइबर आक्रमणद्वारा अमेरिकी निर्वाचन प्रभावित तुल्याउने र रिपब्लिकन नेता डोनाल्ड ट्रम्पको पक्षमा माहोल खडा गरेकोे भन्ने भावसहित सिआइएको रिपोर्ट सार्वजनिक गरिएकोे थियोे । अमेरिकी राष्ट्रपति बाराक ओबामाको निर्देशन र अमेरिकी कंग्रेसको मागअनुसार सिआइएको प्रतिवेदन बाहिर ल्याइएको र यसमा सन् २०१६ को निर्वाचन समयमा भएका साइबर अपराधसम्बन्धी घटना र अमेरिकी निर्वाचनमा रूसी हस्तक्षेपका बारेमा जनाइएको छ ।

नवनिर्वाचित राष्ट्रपति ट्रम्प र उनको दलले यसको खण्डन गरिसकेको छ । रिपब्लिकन पार्टीका नेसनल कमिटीका प्रवक्ता सिन स्पाइसरले गुप्तचर संस्थाबाट आएको सूचना ‘गलत’ भएको भनी प्रतिवेदनको खण्डन गरेका छन् । त्यसैगरी ट्रम्पले पनि सूचनालाई ‘प्रतिशोधपूर्ण’ भन्दै ट्विटमार्फट खण्डन गरेका थिए ।

गत जुलाईमा हिलारी क्लिन्टनको निर्वाचन अभियानले डेमोक्रेटिक नेसनल कमिटीबाट लज्जास्पद इमेल चुहावटबारे कुरा उठाएपछि रू अमेरिकी राजनीतिमा प्रवेश गरेको थियो । रूसी राष्ट्रपतिले अमेरिकी निर्वाचनमा रूसको हात रहेको भनी आएका समाचारलाई अमेरिकी मतदाताको ध्यानलाई स्थानीय मुद्दालाई विषयान्तर गर्ने प्रयास भनी आरोपको गत अक्टोबरमा नै खण्डन गरेका थिए । रासस/एएफपी