दुई बजे नै बन्द हुन्छन् स्वास्थ्य केन्द्र

कपिलवस्तु: सरकारले सबै स्वास्थ्य संस्थाहरूको ओपीडी सेवा अनिवार्य रूपमा पाँच बजेसम्म खोल्नुपर्ने निर्देशन दिएको भए पनि जिल्लाका अधिकांश स्वास्थ्य केन्द्रहरू निर्धारित समयसम्म खुल्ने गरेका छैनन् । नागरिक मैत्री स्वास्थ्य नीति लागू गर्दै सरकारले सुरु गरेको यो प्रयास जिल्लाका विभिन्न स्थानका स्वास्थ्यकर्मीहरूले लत्याएका हुन् । सरकारी नीतिविपरीत स्वास्थ्य केन्द्रहरू दुई नबज्दै बन्द गर्ने गरिएका छन् ।

जिल्लाको सोमडिह, बैदौली र गोटिहवा स्वास्थ्यचौकी दुई बजे नै बन्द गरिएको अनुगमनका क्रममा भेटिएको हो । स्वास्थ्य चौकीमा हेल्थ असिस्टेन्ट, अहेब, अनमी, कार्यालय सहयोगीलगायत सातजना कर्मचारीको दरबन्दी भए पनि स्वास्थ्यचौकीमा भने दुई बजेपछि कुनै पनि कर्मचारी भेटिएनन् ।

कर्मचारी नियमित आउने गरे पनि स्वास्थ्यचौकी भने दुई बजेतिरै बन्द हुने गरेको सोमडिह ५ सुल्तनवापुरकी भोनु रैदासले बताइन् । सञ्चारकर्मी सोमडिह ५ स्थित सुल्तनवापुरमा बन्द अवस्थामा रहेको स्वाथ्यचौकीमा पुग्दा त्यहाँ आइपुगेका स्वास्थ्यचौकी इन्चार्ज अशोक कुमार मि श्रले अर्को गाउँमा कुष्टरोगी फेला परेकाले स्वास्थ्य केन्द्र बन्द गरेको बताए ।

जिल्ला स्वास्थ्य कार्यालयले कार्यालय समयसम्म स्वास्थ्यचौकी खोल्न परिपत्र गरेको भए पनि आफूहरूले चाँडै स्वास्थ्य केन्द्र बन्द गर्नु त्रुटी भएको उनले स्वीकार गरे ।

बैदौली गाविस ५ मा रहेको बैदौली स्वास्थ्यचौकी पुग्दा त्यहाँ पनि दुई बजे नै स्वास्थ्यचौकी बन्द गरिएको अवस्थामा भेटिएको थियो । स्थानीय राधेश्याम पाठकले सरकारले कार्यालय समयसम्म स्वास्थ्य केन्द्र खोल्न निर्देशन जारी गरेको भए पनि हरेक दिन दुई बजे नै स्वास्थ्यचौकी बन्द गरिने गरेको बताए । स्वास्थ्य सेवा प्रदायकले सरकारको नीति उलंघन गर्दा स्थानीय मर्कामा परेको उनले बताए । आफूहरूले पटकपटक तोकिएको समय अवधिसम्म स्वास्थ्य केन्द्र सञ्चालन गर्न निर्णय गरेको भए पनि कर्मचारीहरूले अटेर गर्ने गरेको सोही गाविसका स्वास्थ्य व्यवस्थापन समितिका सदस्यले आरोप लगाए ।

कपिलवस्तु नगरपालिका १५ मा रहेको गोटिहवा स्वास्थ्यचौकीमा पुग्दा कर्मचारीहरू दुई बजे नै स्वास्थ्यचौकी बन्द गरेर हिँडिसकेका थिए । कपिलवस्तु नगरपालिकाको वडा कार्यालयमा कार्यरत कर्मचारी हरिकिशोर यादवले हरेक दिन दुई बजे नै स्वास्थ्यचौकी बन्द हुने गरेको बताए । जिल्ला स्वास्थ्य कार्यालयका प्रमुख योगेन्द्र भगतले स्वास्थ्य मन्त्रालयको निर्देशन अनुरूप जिल्लाका सम्पूर्ण स्वास्थ्य केन्द्रलाई जाडोको समयमा चार बजे र अन्य समयमा पाँच बजेसम्म स्वास्थ्य केन्द्र सञ्चालन गर्न परिपत्र गरिएको बताए । उनले समयअगावै स्वास्थ्य केन्द्र बन्द गर्ने कार्य भएको भए कारबाही प्रक्रिया अगाडि बढाइने बताए । सदरमुकामदेखि १५ किलोमिटर दूरीका स्वास्थ्य केन्द्रको अनुगमन गर्ने गरेको उनले बताए ।

कार्यालयका अनुसार १५ किलोमिटरभन्दा बढी दूरीमा रहेका स्वास्थ्य केन्द्रको अनुगमन गर्न जाँदा राजपत्र अंकित कर्मचारीले दैनिक एक हजार ६ सय र राजपत्र अनंकित कर्मचारीले दैनिक एक हजार दुई सय रुपैयाँ दैनिक भत्ता र यातायात खर्च पाउने व्यवस्था रहेको छ । भत्ता नपाउने भएकै कारण जिल्लाका कर्मचारीले सदरमुकामसँग १५ किलोमिटरको दूरीमा रहेका दुई दर्जनभन्दा बढी स्वास्थ्यचौकीमा अनुगमन गर्न जाँदैनन् ।

सदरमुकामबाट १५ किलोमिटरको दूरीमा रहेका लबनी, बासखोर, पकडी, अभिराव, डुमरा, धरमपनिया, दोहनी, हरनामपुर, पिपरा, गोटिहवा, पर्सोहिया, वसन्तपुर, रंगपुर, सोमडिह, सिहोखोर, बैदौली, सौराहा, गौरी, तितिर्खी, बलुहवा, तिलौराकोट, निग्लिहवा, कोपवा, हथौसा, जहदी र फुलिकामा कार्यालयको अनुगमन हुने गरेको छैन । पछिल्लो समय जिल्लाका सबै स्वास्थ्यचौकीमा हेल्थ असिस्टेन्ट, अहेब, अनमी, ग्रामीण स्वास्थ्य कार्यकर्ता, मातृशिशु कार्यकर्ता र कार्यालय सहायक गरी कम्तिमा पनि ७ जना कर्मचारी खटाइएको छ ।