काठमाडौंः मंगलबार उर्जामन्त्री जनार्दन शर्माले आफूलाई विद्युत प्राधिकरणको कार्यकारी निर्देशक बनाइदिन १० करोड अफर आएको औपचारिक कार्यक्रममै सार्वजनिक गरेपछि यो विषयले चर्चा पाएको छ ।
विराटनगरका उद्योगी व्यवसायीले मंगलबार आयोजना गरेको उर्जा सम्बन्धी अन्तरक्रिया कार्यक्रममा मन्त्री शर्माले यस्तो खुलासाा गरेका हुन् । शर्माका अनुसार प्राधिकरणको कार्यकारी निर्देशक बनाइदिन पाँच व्यक्तिले १० करोडको अफर गरेका थिए ।
कार्यक्रममा मन्त्री शर्माले त्यस्तो प्रस्ताव स्वीकार गरेको भए आफू तत्काल उद्योगपति हुने समेत बताएका थिए । उनले त्यस्तो बाटो नरोजिकन जनताको घर आगनमा झिलिमिली बिजुली बाल्ने बाटो रोजेको दाबी गरेका छन् ।
कार्यक्रममा मन्त्री शर्माले भनेका थिए, ‘मैले त्यस्तो (१० करोडको) अफर स्वीकार गरेको भए तपाईंहरु जस्तै उद्योगपति म पनि हुनसक्थेँ होला ! तर, मैले त्यो बाटो रोजिन । परिणामस्वरुप आज जनताको घर आगनमा झिलिमिली बत्ती बलेको छ ।’
ऊर्जामन्त्रीले औपचारिक कार्यक्रममै आफूलाई यस्तो अफर गरे पनि कसले अफर गर्यो भन्ने सार्वजनिक भएको छैन् । भ्रष्टाचार निवायरण हुनुपर्छ भन्ने ऊर्जामन्त्रीले आफूलाई घुसको अफर गर्ने व्यक्तिलाई संरक्षण दिन मिल्छ र ? कि किन ऊर्जामन्त्रीले आफूलाई १० करोड अफर गर्नेको नाम सार्वजनिक गरेनन् ?
यो अति गम्भीर प्रश्न हो । मन्त्री शर्माले यदि सस्तो लोकप्रियताका लागि मात्र यो अभिव्यक्ति दिएका होइनन् भने यस्तो अफर गर्नेलाई किन कानुनी दायरामा नल्याउने ?
प्रतिक्रिया दिनुहोस !
