हत्यारालाई तत्काल कारबाहीको माग गर्दै नाराजुलुस

बनेपाः बोक्सीको आरोपमा लक्ष्मीको हत्यामा संलग्नलाई कारबाहीको माग गर्दै जिल्ला प्रहरी कार्यालय धुलिखेलमा प्रदर्शन भएको छ ।

सदरमुकाम धुलिखेलमा प्लेकार्ड र व्यानर बोकेर कारबाहीको माग गर्दै विभिन्न संघसंसथा र पिडितहरुको प्रदर्शन गरेका हुन् । दलित शक्ति नेपाल काठमाण्डौले बोक्सी आरोपमा मलमूत्र खुवाएको घटनामा मिलापत्र गर्ने प्रहरीलाई समेत कारबाहीको माग गरिएको छ ।

दलित शक्ति नेपालका प्रवक्त दलमर्दन कामीले भने-‘बोक्सीको आरोप लगाउनु जगन्य अपराध हो’,त्यसैले घटनामा संम्लग्न दोषीलाई छिटो कारबाही गर्नुपर्छ । गत २० गते स्थानीय शिक्षकको नेतृत्वमा विद्यालयको पोलमा बाँधेर मृतक लक्ष्मीलाई कुटपिट गरी दिसा खुवाएको तेस्रो दिन प्रहरीले मिलापत्र गराएको भन्दै घटनामा संम्लग्न लाई तत्काल कारबाहीको माग गर्दै दलित शक्ति नेपालका कार्यकर्ता र पिडित परिवाका सदस्यहरुले जिल्ला प्रहरी कार्यलय अगाडी धर्ना दिएका थिए ।

विज्ञप्तीमा दुव्र्यवहार भएपछि न्याय माग्न आएका पीडितलाई प्रहरी इन्चार्जले आफूहरूले महिलाको विषय नहेर्ने भन्दै गाउँमा गएका प्रहरी इन्चार्जले थप अनुसन्धान गर्नुको सट्टा मिलापत्र गराई पठाउने प्रहरीलाई कारबाहीको माग गरिएको छ । भने घटनामा संलग्न स्थानीय शिक्षक हिरा लामा र उनको आमालाई कडा भन्दा कडा कारबाहीको समेत माग गरिएको छ ।

छ दिनपछि पनि हुन सकेन लक्ष्मीको पोस्टमार्टम

बोक्सीको आरोपमा मलमूत्र खुवाउँदै चिर्पटले हानेर घाइते बनाइएकी काभ्रे सानो बाङथलीकी लक्ष्मी परियारको मृत्यु भएको छ दिन बित्दा पनि पोस्टमार्टम भएको छैन । शव त्रिवि शिक्षण अस्पतालमा राखिएको छ । मानवअधिकार आयोग तथा राष्ट्रिय दलित आयोगले स्थलगत अनुगमनपछि मात्र पोस्टमार्टम गर्न आग्रह गरेकाले रोकिएको प्रहरीले जनाएको छ ।

आयोगले सोमबार तथा दलित आयोगले मंगलबार घटनास्थलमा पुगी अनुसन्धान अघि बढाएका छन् । बुधबार पोस्टमार्टम गर्ने बताएपनि प्राविधीक कारण देखाउदै रोकीएको बताए ।

२० मंसिरमा सूर्योदय स्कुलको प्रांगणको पोलमा बाँधेर लक्ष्मीलाई कुटपिट गरी मलमूत्र खुवाइएको राष्ट्रिय मानवअधिकार आयोगको स्थलगत अनुगमनमा स्थायिहरुले बताएका थिए । बोक्सी भन्दै उनलाई कुटपिट भएको मृतकका छोरा र स्थानीयले बताएका छन् ।

तर, गाली गर्ने क्रममा बोक्सी भनेको वा बोक्सीकै आरोप लगाएर कुटपिट गरेको भन्ने विषय प्रस्ट भइनसकेको अनुसन्धानमा आबद्ध प्रहरी तथा अधिकारकर्मीले बताएका छन् । २० गते उनलाई कुटपिट गरी घाइते बनाएको चार दिनपछि उनको मृत्यु भएको थियो ।

श्रीमानसहित चारविरुद्ध ज्यान मुद्दा

काभ्रे सानो बाङथलीकी लक्ष्मी परियारको हत्या आरोपमा प्रहरीले उनका श्रीमानसहित चारजनाविरुद्ध ज्यान मुद्दा अघि बढाएको छ । बोक्सीको आरोप लगाउँदै स्कुलको पोलमा बाँधेर मानव मलमूत्र खुवाउँदै कुटपिट गर्ने स्थानीय शिक्षक हीरा लामा, उनकी आमा काइँलीमाया लामा, सोही गाउँकी निरमाया तामाङ र लक्ष्मीका श्रीमान् मिलनलाई अदालतमा पेस गरी थुनामा राख्ने म्याद लिएर प्रहरीले अनुसन्धान अघि बढाएको छ ।

स्थानीय महिला निरमायाले लक्ष्मीलाई बाँध्न डोरी दिँदै हीरा लामालाई सहयोग गरेकी थिइन् । मिलनले आफूले श्रीमतीलाई कुटेको स्विकारेका छन् । हत्यामा चारजनाको संलग्नता पुष्टि भएकाले उनीहरूलाई कर्तव्य ज्यान मुद्दामा थुनामा राखी अनुसन्धान अघि बढाइएको जिल्ला प्रहरी कार्यालयका प्रमुख एसपी सहकुल थापाले बताए ।