आमाहरूले निकाले साङ्लाे जुलुस
भैरहवाः सरकारले प्रदेश टुक्र्याउन थालेकोप्रति आपत्ति जनाउँदै महिला सञ्जालका आमाहरूले बुधबार साङ्लो जुलुसमा निकालेका छन् । जनभावना विपरीतको प्रदेश नम्बर ५ का पहाडी जिल्लालाई अलग्याउन सदनमा दर्ता भएको संशोधन प्रस्ताव फिर्ता लिन दवाव लिन यस क्षेत्रमा दुई सातादेखि विभिन्न चरणका दबाबमुलक प्रदर्शन जारी छन् ।
संयुक्त संघर्ष समितिको समन्वयमा महिला सञ्जालको नेतृत्वमा आमाहरूले भैरहवाको बुद्धचोक, बुटवलको राजमार्ग चौराहा, सालझन्डी, सैनामैना र देवदहमा साङ्गले जुलुस निकालेर दिउँसो १ बजेदेखि २ बजेसम्म चक्काजाम गरेका हुन् ।
समितिले बिहीबार साँझ सिठीसहितको मसाल जुलुस प्रदर्शन गरी विरोध गर्ने र पुस १ गतेदेखि ३ गतेसम्म प्रदेश नम्बर ५ का सबै जिल्लामा आमहडताल गर्ने कार्यक्रम रहेको एमाले नेता एवं बुद्धिजीवी परिषद् सदस्य प्राध्यापक भरत पोख्रेलले जानकारी दिए ।
प्रधानमन्त्रीलाई माला र कैंची उपहार
गुल्मीः सरकारले व्यवस्थापिका संसद्मा दर्ता गरेको संविधान संशोधन प्रस्तावको विरोधमा बुधबार पन्धौँ दिन पनि आन्दोलन जारी राखेका छन् । आन्दोलनलाई महिलाले नेतृत्व गरेका थिए । महिलाहरूले प्रमुख जिल्ला अधिकारीमार्फत प्रधानमन्त्रीलाई ज्ञापनपत्र बुझाउन खोज्दा प्रहरीले दमन गरेपछि केहीबेर प्रदर्शनकारी र सुरक्षाकर्मीबीच झडप भएको थियो ।
महिलाले ज्ञापनपत्रसहित नेपालको नक्सा र फूलको मालासँगै कैँची प्रधानमन्त्रीलाई उपहार पठाएका छन् । उनीहरूले एउटै मालामा उनिएर बसेका नेपालीलाई कैँचीले काटेजस्तै काट्ने दुश्प्रयासका विरुद्ध उपहार पठाएको बताएका छन् ।
आन्दोनमा सहभागी महिलाले दिनभर सरकार विरोधी नाराबाजी गर्दै प्रधानमन्त्री पुष्पकमल दाहालको राजीनामा माग गरेका छन् । सरकारले पन्ध्र दिन भइसक्दासमेत आन्दोलनको सुनावाइ नगरेपछि महिलाहरू आक्रोशित भएका थिए ।
गुल्मी मालेका समानुपातिक सांसद कमला विश्वकर्मासहित महिला नेतृ विष्णुकमारी सापकोटा, मैना भण्डारीलगायतले प्रमुख जिल्ला अधिकारी कृष्णप्रसाद ढुंगानामार्फत प्रधानमन्त्रीलाई ज्ञापन पत्र बुझाएका छन् । बन्दका कारण जनजीवन कष्टपूर्ण बन्दै गएको छ ।
प्रतिक्रिया दिनुहोस !
