स्टाइलिस जिन्स

सजिलो, स्टाइलिस र ग्ल्यामरस पहिरनका रूपमा परिचित छ जिन्स । रङमा विविधतामात्रै होइन; कपडाझैं नरम, स्ट्रेचेवलदेखि हार्ड जस्तोसुकै प्रकारका जिन्स पाइने हुनाले धेरैको रोजाइमा पर्छ यो । 'रफ' पहिरनका सोखिनलाई त जिन्स वरदान नै मानिन्छ, जुन अन्य कपडामा शोभायमान मानिँदैन । जिन्सको अर्को विशेषता हो 'टाइट फिटिङ' । यसले 'ब्युटी अफ बडी'लाई न्याय गर्छ । ग्ल्यामरस लुक दिन्छ । त्यसैले खानपान र व्यायामका माध्यमबाट सुन्दर एवं आकर्षक शरीर बनाउनेहरू जिन्सका बढी नै पारखी हुन्छन् ।

विश्वमा जस्तै नेपाली समाजमा पनि जिन्स बहार छाएको छ । गाउँदेखि सहरसम्म, हिमालदेखि तराईसम्म जिन्सका पहिरन चल्तीमा छ । केटाकेटी दुवैले बराबरी प्रयोग गर्ने सबभन्दा रुचाइएको पहिरनमा पर्छ जिन्स ।

आइरन लगाउनु नपर्ने, क्याजुअल र सेमी फर्मल दुवैमा प्रयोग हुनु जिन्सको राम्रो पक्ष मानिन्छ । काठमाडौंको सिनामंगलस्थित यस इन्टरनेसनल कलेजमा बीबीए बीआई (स्नातक) अध्ययनरत एलिजा भट्टराई जिन्सकी पारखी हुन् ।

'जिन्समा आकर्षक, स्टाइलिस र पर्सनालिटी पनि खुल्छ । लुक्स राम्रो देखिन्छ', एलिजाले भनिन्, 'मैले थाहा पाएदेखि नै जिन्स लगाउन थालेकी हुँ । हाइटी केटीहरूलाई जिन्सले झन् सुहाउँछ ।'

उनको अनुभवमा जिन्स पेन्ट लगाएर बस्दा अलि अप्ठ्यारो हुनुबाहेक अन्य बेफाइदा केही छैन । जिन्सका शिरदेखि पाउसम्म लगाउन मिल्ने सबै प्रकारका पहिरन बनेका छन् ।

एलिजाजस्तै अस्मिता बस्नेतलाई पनि जिन्सको पहिरन मन पर्छ । हालै आफ्नो ग्ल्यामरस फोटोसुट गराएकी उनले जिन्सको पहिरनमा फोटो लिन छुटाइनन् । 'बाहिर कतै जाँदा म प्रायः जिन्स पेन्ट लगाउँछु । 'जिन्स जति सजिलो र आरामदायी लाग्छ, व्यक्तित्व पनि त्यत्तिकै खुल्छ', अस्मिताले भनिन् ।

उनले पनि सानै उमेरदेखि जिन्स लगाउन थालेकी हुन् । उनी पनि घरमा बस्दा जिन्सका पहिरन खासै लगाउँदिनन् ।

कोरियोग्राफर रोजिन शाक्यको अनुभवमा मोडेलहरूको पहिलो रोजाइमा पर्छ जिन्सका पहिरन । 'फेसन सोमा जिन्स खासै नचले पनि लगाउन सजिलो, आरामदायी र स्टाइलिस हुने भएकाले दैनिक जीवनमा भने मोडेलहरू प्रायः जिन्स रुचाउँछन्', उनको भनाइ छ ।

कोरियोग्राफर शाक्य पनि जिन्सका पारखी हुन् । 'म ८० प्रतिशतभन्दा बढी जिन्स नै लगाउँछु । जिन्सको पेन्ट, कोट र सर्ट बढी मन पर्छ', उनले भने ।

जिन्स अहिले फेसनेबल सेलिब्रेटीको रोजाइमा परे पनि यसको इतिहास भने फरक छ । जिन्सका आविष्कारक ज्याकव डब्लु डेभिस हुन् । रुसमा जन्मेका अमेरिकी आप्रवासी डेभिसले अमेरिकी कपडा कारखाना 'लेभी स्ट्रउस एन्ड को'सँगको सहकार्यमा सन् १८७१ मा जिन्स आविष्कार गरेका हुन् । डेभिस र अमेरिकाका लेभी स्ट्रउसले सन् १८७३ मा यसलाई सफलताका साथ प्रयोगमा ल्याए ।

खासगरी गाई गोठालो र खनिजमा काम गर्ने कामदारका लागि खप्ने पहिरनका रुपमा जिन्सको आविष्कार गरिएको थियो । सन् १९५० को दशकमा कामदार टिनएजरमाझ जिन्स लोकप्रिय भयो ।

सन् १९६० को दशकदेखि हिप्पी (अमेरिका र बेलायतबाट सुरु भएको बिन्दास युवाहरूको अभियान)हरू पनि जिन्सका पारखी बने । जिन्सको लोकप्रियता एकपछि अर्को मुलुकमा चुलिँदै गयो । सन् १९७० को दशकमा जिन्स हेभी मेटल र पंक रक (फेसन, एक्स्प्रेसन, नृत्य, साहित्य, चलचित्र आदिको सम्मि श्रण) पाखरीमाझमा पनि छाउन पुग्यो ।

'ली' नामले समेत चिनिएको जिन्स आविष्कारपछि कहिल्यै छायाँमा परेन । सुरुमा कामदारका लागि भनेर आविष्कार गरिए पनि जिन्स हरेक वर्ग र समुदायमा लोकप्रिय बन्यो ।

सन् २०१० को दशकसम्म आइपुग्दा महिला, पुरुष, वृद्धवृद्धा, बालबालिका, धनी, गरिब सबैले जिन्सका परिहन प्रयोग गर्न थाले । अझ विभिन्न सेलिब्रेटीको समेत रोजाइमा परेपछि संसारमा जिन्सको परिहन फेसनको पर्याय बन्न पुग्यो ।

खासगरी क्याजुअल वेयरका रूपमा लिइने जिन्सको पहिरन नलगाउने सेलिब्रेटी विश्वमा सायदै होलान् ।