धादिङः पृथ्वी राजमार्गको नौबिसे मुग्लिन सडकखण्ड अन्तर्गत भुमेस्थान ६ कोइरालेमा स्कार्पियो जिप दुर्घटना हुँदा तीनजनाको मृत्यु भएको छ ।
मुग्लिनबाट काठमाडांै जाँदै गरेको ग २ च ४५७२ नम्बरको जिप सडकबाट अन्दाजी एक सय मिटर तल खसेर दुर्घटना भएको हो । शुक्रबार बिहान ३ बजेतिर भएको दुर्घटनामा परि चालकसहित एक महिला र एक पुरुषको घटनास्थलमै मृत्यु भएको बैरेनी प्रहरीले जानकारी दिएको छ ।
मृत्यु हुुनेमा लमजुङ गाउँसहर–६ निवासी २५ वर्षीय माधव धिताल, बेंसिसहर– १४ निवासी ३१ वर्षीय विष्णुबहादुर रावतको सनाखत भएको छ । जिपमा सवार अन्दाजी ४५ बर्षीया हरियो सुरुवाल, रातो कुर्ता र कालो ज्याकेट लगाएकी महिलाको भने सनाखत हुन सकेको प्रहरीले बताएको छ ।
तीव्र गतिका कारण जिप सडकबाट खसेको घटनास्थलमा पुगेका प्रहरीचौकी बैरेनीका इन्चार्ज सुरेन्द्रकुमार शाहले जानकारी दिए । उनले भने, ‘घटनास्थलको प्रकृति हेर्दा जिप तीव्र गतिमा रहेको र चालक निदाएर सडकबाट तल खसेको हुनसक्छ ।’
मृतकका शव पोष्टमार्टमका लागि प्राथमिक स्वास्थ केन्द्र गजुरीमा राखिएको र दुर्घटनाबारे थप अनुसन्धान भइरहेको जिल्ला प्रहरी कार्यलय धादिङले जानकारी दिएको छ ।
प्रतिक्रिया दिनुहोस !
