एजेन्सीः बलिउड नायिका करिना कपुरले छोरालाई जन्म दिएकी छिन् । करिनाका श्रीमान नायक सेफ अलि खानले वक्तव्य सार्वजनिक गर्दै छोरा जन्मिएको जानकारी गराएका छन् ।
नायक सेफले बुबा बन्न पाउँदा खुसी व्यक्त गरेका छन् । ‘सन्तान आगमनले हामीलाई पूर्ण बनाएको छ’, विज्ञप्तिमा भनिएको छ, ‘बुबाआमा बन्न पाएकोमा हामी खुशी छौँ ।’
करिनाले मुम्बईको एक अस्पतालमा छोरालाई जन्म दिएकी हुन् । अस्पतालले करिना र उनका छोरा दुवैको स्वास्थ्य ठिक भएको बताएको छ ।
छोराको नाम तैमुर राखिएको समेत सेफले सार्वजनिक गरेको विज्ञप्तिमा उल्लेख गरिएको छ । करिनाले छोरा जन्माएपछि सेफ तीन सन्तानका पिता भएका छन् । यस अघि सेफकी पहिलो श्रीमतीका दुई छोराछोरी छन् ।
बलिउडमा चर्चित करिनाले ५० बढी चलचित्रमा अभिनय गरेकी छिन् भने उनका श्रीमान सेफले ४० बढी चलचित्रमा अभिनय गरेका छन् । पाँच वर्ष लामो प्रेम सम्बन्धपछि करिना र सेफले सन् २०१२ मा विवाह गरेका हुन् ।
प्रतिक्रिया दिनुहोस !
