सकियो चाइना फेस्टिभल
काठमाडौः होटेल याक एन्ड यतीको बल रुममा ‘ज्यासमिन फ्लावर' गीत गुञ्जियो । ज्यासमिन फुल्ने समयलाई इंगित गर्दै मानव जीवनलाई फूलसँगै तुलना गरेको यही गीतबाट चाइना महोत्सवको सुरुवात भयो । नेपाली र चिनियाँ दर्शकमाझ चिनियाँ कलाकारले संस्कृति प्रस्तुत गरे ।
सोमबारदेखि सुरु भएको चाइना फेस्टिभलको अन्तिम दिन बुधबारको सांस्कृतिक कार्यक्रमले नेपाली दर्शकलाई निकै लोभ्यायो । चिटिक्क परेका चिनियाँ कलाकारको जोसिलो प्रस्तुतिको अगाडि भाषाको समस्या छायामा पर्यो । संगीतको कुनै भाषा हुँदैन ।
कार्यक्रमको दोस्रो प्रस्तुति थियो, सुना बाजा । सुना बाजाले दर्शकको मन लोभ्याएपछि अर्को लोभलाग्दो प्रस्तुति थियो, कन्स्यु ओपेरा । जुन ६ सय वर्ष पुरानो संगीत हो । यो संगीत चीनको अमूर्त सांस्कृतिक सम्पदामा सूचित छ ।
‘पपेट शो' सबैभन्दा रोचक प्रदर्शनी बन्यो । कठपुतलीले ‘नेपाल चीन मित्रता' लेख्दा दुवै देशका दर्शक निकै उत्साही देखिए । कठपुतलीको रमाइलो क्रियाकलापपछि नेपाली गायक साज सिंह र चिनियाँ गायिका सियानले ‘रेसम फिरिरी' गाए ।
चिनियाँ कलाकारले आफ्नो संस्कृति त देखाए नै, नेपाली संस्कृतिको पनि केही अंश सिके ।
चिनियाँ कलाकारले आफ्नो संस्कृति त देखाए नै नेपाली संस्कृतिको पनि केही अंश सिके । सियानले गीत गाउँदा नेपाली गीतमात्र नभई संस्कृतिलाई नै टपक्क टिपेकी छन् जस्तो लाग्यो ।
कार्यक्रममा गीत संगीतसँगै जादु र कम्फुसमेत प्रस्तुत भए । हरेक दुई वर्षमा आयोजना हुने महोत्सवको यो सातौं संस्करण हो । दुवै देशका संस्कृति मन्त्रालय र नेपालका लागि चिनियाँ दूतावासको आयोजनामा भएको कार्यक्रमका लागि ५० जना चिनियाँ कलाकार नेपाल आएका थिए ।
प्रतिक्रिया दिनुहोस !
