छिमेकसँग पनि समस्या
म २२ वर्षदेखि चलचित्र क्षेत्रमा क्रियाशील छु । तर, यसबीचमा चलचित्रको विकास र परिर्वतन भएन । राम्रा र प्रतिभावान् धेरै साथीहरू विदेश पलायन भएका छन् । विदेशमा भेट्दा उनीहरूको आँखा रसाएको हुन्छ । नचाहेर पनि विदेशमा बस्न बाध्य भएका छन् । त्यसको मुख्य कारण आर्थिक पक्ष नै हो ।
चलचित्र क्षेत्रमा वर्षौं मेहनत गर्दा पनि केही नभएपछि बिदेसिनुको पीडा उनीहरूलाई मात्र थाहा छ । यदि चलचित्र क्षेत्रमा परिवर्तन आउन सकेन, यो क्षेत्रको विकास भएन भने त्यो पीडा मलाई पनि आइलाग्न सक्छ । त्यसैले यो क्षेत्रका लागि केही गर्ने संकल्पसहित नेपाल चलचित्र निर्माता संघको अध्यक्षमा लड्ने निर्णय गरेँ ।
मेरो यो निर्णयमा सबै चलचित्र निर्माता साथीहरूको साथ रह्यो । मैले जे संकल्प गरेँ त्यो सबै निर्माता र चलचित्रकर्मीको चाहना हो । नेपाल चलचित्र निर्माता संघको १४औं साधारणसभाबाट मेरो नेतृत्वमा सबै पदाधिकारी सर्वसम्मत भएकाले यसले मलाई थप उत्साहित बनाएको छ ।
यसबाट राम्रो सन्देश पनि गएको छ । हामीबीच कुनै द्वेष र असमझदारी छैन । अब हामी सबै निर्माताहरू एक भएर नेपाली चलचित्रको विकासमा लाग्नेछौं । चलचित्र क्षेत्रमा परिवर्तन आयो भने बिदेसिएका साथीहरू नेपाल फर्कन तयार छन् ।
चलचित्रसँग सम्बन्धित धेरै संघसंस्था भए पनि नेपाल चलचित्र निर्माता संघ मूल काण्ड हो । जसरी रूखको मूल काण्ड कमजोर भयो भने अन्य हाँगाहरू सुक्छन्, फल लाग्दैन त्यसरी नै चलचित्र उत्पादन भएन भने अन्य पक्ष यसै पनि कमजोर भएर जान्छ । हुन त म निर्देशक, कलाकार, चलचित्र व्यवसायी हुँ तर निर्माताकै भूमिका महत्वपूर्ण रहन्छ ।
बक्स अफिस लागू गर्नलाई मैले पहिलो प्राथमिकतामा राखेको छु । चलचित्र विकास बोर्डले पनि यो प्रक्रियालाई निकै अगाडि बढाइसकेको छ । सात वर्ष अगाडि बक्स अफिसको खाका तयार गरेर मैले नै विकास बोर्डमा बुझाएको थिएँ । विश्वले ‘सिस्टम' को विकास गरेर ‘मेनपावर' घटाउँदै लगेको छ ।
चलचित्र क्षेत्रका लागि बक्स अफिस त्यस्तै एउटा महत्वपूर्ण सिस्टम हो । नेपालमा निर्माता र हल सञ्चालकबीच सधैं विवाद र असमझदारी हुँदै आएको छ ।
अफिस लागू भएपछि त्यो विवाद र असमझदारी समाधान हुन्छ ।
अफिससँगै चलचित्र क्षेत्रमा देखिएका अन्य समस्या समाधान मेरो प्राथमिकतामा रहनेछ । त्यसपछि छिमेकी मुलुकमा नेपाली चलचित्रको सहज सेन्सरसिपका लागि पहल गर्नेछु । जसरी हिन्दी चलचित्र नेपालमा तुरुन्त सेन्सर हुन्छ त्यसरी नै नेपाली चलचित्र पनि भारतमा तुरुन्त सेन्सर हुनुपर्छ । स्वदेश र छिमेकसँगको समस्यापछि नेपाली चलचित्रलाई कसरी विश्वबजारमा पुर्याउन सकिन्छ भन्नेमा केन्द्रित हुनेछु ।कुराकानीमा आधारित
संघमा सबै निर्विरोध
काठमाडौः नेपाल चलचित्र निर्माता संघको अध्यक्षमा आकाश अधिकारी निर्विरोध निर्वाचित भएका छन् । शुक्रबार राजधानीमा सम्पन्न संघको १४औं साधारणसभाबाट अध्यक्षसहित सबै पदाधिकारी निर्विरोध भएका हुन् ।
उपाध्यक्षमा माधव वाग्ले र गोविन्द शाही, महासचिवमा रोज राणा, सचिवमा छविराज ओझा र कोषाध्यक्षमा सुशील पोख्रेल चयन भएका छन् । कार्यसमिति सदस्यहरूमा करिश्मा मानन्धर, दीपकराज गिरी, दीपेन्द्र के खनाल, अर्जुनकुमार श्रेष्ठ, चेतन सापकोटा, निकिता पौडेल, भानु प्रताप, रोहित अधिकारी र रौनक विक्रम रहेका छन ।
चलचित्र निर्देशक समाजमा महासचिवका रूपमा दुई कार्यकाल जिम्मेवारी सम्हालेका आकाश राष्ट्रिय चलचित्र निर्माता संघमा पनि महासचिवका रूपमा काम गरे । राष्ट्रिय चलचित्र निर्माता संघ र नेपाल चलचित्र निर्माता संघबीच एकता भएपछि उनले संघको प्रथम उपाध्यक्षको जिम्मेवारी पाएका थिए । नेपाली चलचित्रमा अध्ययनशील, नम्र र मेहनती मानिने आकाश निर्विवाद पनि छन् ।
प्रतिक्रिया दिनुहोस !
