पुटिन ‘धेरै बुद्धिमान्’ नेता भन्दै ट्रम्पद्वारा प्रशंसा

वासिङटन: अमेरिकी राष्ट्रपतिमा निर्वाचित डोनाल्ड ट्रम्पले रूसी राष्ट्रपतिले अमेरिकी कूटनीतिज्ञलाई अमेरिकी नयाँ प्रशासनको नीति हेरेर मात्र स्वदेश फिर्ता गर्ने भनी दिएको प्रतिक्रियापछि रूसी राष्ट्रपति भ्लादिमिर पुटिन ‘धेरै बुद्धिमान्’ नेता भनी प्रशंसा गरेका छन् ।

अमेरिकाले निर्वाचनको समयमा साइबर हमलालगायत हस्तक्षेप गरेको बदलास्वरूप ३५ जना रूसी कूटनीतिज्ञलाई स्वदेश फिर्ता पठाउने निर्णय गरेको थियो । रूसी विदेश मन्त्रालयले पनि अन्तर्राष्ट्रिय कूटनीतिक परम्पराअनुसार ३५ जना अमेरिकी कूटनीतिज्ञलाई कारबाहीका लागि सिफारिस गरी राष्ट्रपति पुटिनकहाँ पठाएको थियो।

पुटिनले अमेरिकामा नेतृत्व परिवर्तन भई रिपब्लिकन नेता तथा अमेरिकी राष्ट्रपतिमा निर्वाचित ट्रम्पको रूसलाई हेर्ने नीतिलाई हेरेर यस विषयलाई अघि बढाउने भनी शुक्रबार प्रतिक्रिया दिएका थिए। रूसी राष्ट्रपतिद्वारा ढिलाई गर्ने निर्णय ‘महान् कदम हो, मैले सधैं उहाँलाई एक बुद्धिमान् विश्व नेताका रूपमा चिन्ने गरेको छु’ भनी ट्रम्पले ट्वीट गरेका छन्।

ट्रम्पको यो भनाइले रिपब्लिकन पार्टीका केही सदस्यसहित डेमोक्रेटिक पार्टीलाई क्रोधित तुल्याएको अमेरिकीलगायत अन्तर्राष्ट्रिय सञ्चारमाध्यमले जनाएका छन्। ट्रम्पको रूसी राष्ट्रपतिलाई बुद्धिमान् भनी गरेको ट्वीट सन्देशलाई वासिङटनस्थित रूसी राजदूतावासले पुनः ट्वीट गरी प्रचार गरेको थियो ।