हिमपातले जाडो बढ्यो

काठमाडौं: पश्चिमी वायु नेपाल प्रवेश गरी तापक्रम घट्दा अघिल्ला वर्षको तुलनामा यस वर्ष जाडो बढ्ने अनुमान गरिएको छ । हिउँदे वर्षा ढिलो भए पनि तुवाँलो र हुस्सुले ढाक्दा तापक्रम घट्दो क्रममा थियो । शनिबार र आइतबार उपत्याकासहितका विभिन्न स्थानमा हल्का वर्षा भएपछि भने जाडो बढेको छ ।

जल तथा मौसम विभागको तथ्यांकअनुसार हिउँदयामको सुरुमै न्यूनतम ४.४ डिग्री तापक्रम पुगेको थियो । साउथ एसियन क्लाइमेट आउटलुक फोरम (सास्कोप) को दुई महिनाअघि भुटानमा सम्पन्न सम्मेलनले नेपालको मौसमको पूर्वानुमान गरेको थियो । सम्मेलनले नेपालमा हिउँदे वर्षा पश्चिम र सुदूरपश्चिममा बढी हुने तथा पूर्व र मध्यमाञ्चलमा कम वर्षा भए पनि ओसिलो हुँदा जाडो बढ्ने अनुमान गरेको मौसमविद् वरुण पौडेलले जानकारी दिए । ओसिलो बढी हुँदा तुवाँलो र बादलले आकाश ढाक्ने भएकाले चिसो बढ्ने पौडेलको भनाइ छ ।

शनिबारदेखि इरान हुँदै भारतको जम्मु कास्मिर क्षेत्रबाट जलवाष्प (मोइस्चर) नेपाल भित्रिएपछि मौसममा परिवर्तन आएको छ । जलवाष्प टाढाबाट आउँदा पानी कम पर्ने भए पनि ओस बढ्दा जाडो बढ्ने विभागको अनुमान छ । यही क्रममा शनिबारदेखि देशभरको तापक्रम घट्नुका साथै छिटफुट वर्षासमेत भएको छ ।

आइतबार उपत्यकासहित पूर्वी तराई र पहाडी क्षेत्रमा पानी परेको छ भने हिमाली जिल्लामा हिमपात भएको मौसम पूर्वानुमान शाखाले जनाएको छ ।

भिडियो हेर्नुहोस्

सन् २०१६ जनवरी पहिलो साता अधिकतम तापक्रममा १८.८ डिग्री थियो भने सन् २०१७ को पहिलो दिन आइतबार तापक्रम १९.५ डिग्री पुगेको छ । उपत्यका र पूर्वी पहाडमा शनिबार शून्य दशमलव एक मिलिलिटर वर्षा भएको छ भने गत वर्ष जनवरी पहिलो साता वर्षा भएको थिएन ।

डडेलधुरा, दिपायलमा साताअघि नै हिउँदे वर्षा भइसकेको छ । बझाङ, बाजुरामा पनि हिमपात भइसकेको छ । मंगलबारदेखि क्रमिक रूपमा मौसममा सुधार आउने विभागले जनाएको छ । आइतबार काठमाडौंको न्यूनतम तापक्रम पाँच डिग्री सेल्सियस छ । मौसममा ८१ प्रतिशत ओस छ ।

तराईका बारा, पर्सा, नवलपरासी, रूपन्देहीमा बाक्लो हुस्सु लागेको छ । सुदूर र मध्यपश्चिमका तराईका जिल्लामा भने मौसम सफा रहेको मौसमविद् समीर श्रेष्ठले जानकारी दिए । यस वर्षको न्यूनतम तापक्रम डिसेम्बर ९ मा ४.४ डिग्री सेल्सियसमा झरेको थियो ।

शनिबार जुम्लामा माइनस ३ डिग्री न्यूनतम तापक्रम मापन गरिएको छ भने अधिकतम विराटनगरमा २६.६ डिग्री सेल्सियस छ । संखुवासभा, सोलुखुम्बु, ताप्लेजुङ, जुम्ला, मनाङ, मुस्ताङ, मुगुको उच्चहिमाली भेगमा हिमपात भइरहेको छ । बंगालको खाडीबाट आउने मनसुनी वर्षाले जुनदेखि सेप्टेम्बरसम्म ८० प्रतिशत वर्षा हुन्छ ।

विभागले शनिबारदेखि बदलिएको मौसम सोमबारसम्म उस्तै रहने अनुमान गरेको छ ।