पाकिस्तानलाई अफगानिस्तान प्रवेश गर्न पासपोर्ट अनिवार्य
इस्लामाबाद: पाकिस्तानी नागरिकलाई अफगानिस्तान प्रवेश गर्न गत आइतबारदेखि राहदानी अनिवार्य गरिएको अफगान सरकारले जानकारी दिएको छ ।
सुरक्षाको कारण देखाउँदै अफगान प्राधिकरणले यसअघि पाकिस्तानीले राहदानीविना अफगानिस्तान घुम्न पाउने पाअधिकार कटौती गरेको हो ।
पाकिस्तानी राहदानी बोकेका व्यक्तिलाई अफगानिस्तान छिर्न भिसा आवश्यक भने छैन ।
पाकिस्तानबाट आतंकवादी छिरेर आफ्नो देशमा अवाञ्छित गतिविधि गरेको अफगान सरकारले बताउँदै आएको छ । पाकिस्तानसँगको सीमाक्षेत्रमा अफगानिस्तानले यस्ता सूचना राखिएका ब्यानर पनि टाँसेको छ । अफगानिस्तानले ७ महिनाअघि पाकिस्तानसँग यस्तो प्रस्ताव राखेको थियो ।
अफगानिस्तानले आफ्नो देशमा आतंक मचाउँदै आएका तालिवान लडाकुलाई पाकिस्तानले सहयोग उपलब्ध गराउँदै आएको दाबी गर्दै आएको छ । उसले आतंकवादलाई प्रायोजन गरेको भन्दै इस्लामाबादको विरोध गर्दै आएको छ । पाकिस्तानले भने यसको खण्डन गर्ने गरेको छ ।
विज्ञहरूका अनुसार अफगानिस्तानले चालेको कदमबाट कैयौं आदिवासी प्रभावित हुनेछन् । कैयौं आदिवासीका परिवार पाकिस्तान र अफगानिस्तान दुवै देशतर्फ बस्दै आएका छन् । करिब ९३ हजार पाकिस्तानी आदिवासीलाई अफगानिस्तानले विशेषखालको प्रमाणपत्र दिँदै आएको थियो । यसअघि आदिवासीहरूलाई दुवैतर्फ निर्बाध रूपमा आवतजावत गर्न बाधा नहओस् भनेर उक्त छुट दिइएको थियो ।
आदिवासीलाई भने अफगानिस्तानले विशेष कार्ड पनि जारी गरेको छ । यसको सबै पाकिस्तानीले फाइदा लिँदै आएका थिए । अब कुनै पनि नागरिक पाकिस्तानबाट विनाराहदानी अफगानिस्तान छिर्न खोजेमा तालिवानका कार्यकर्ता सम्झेर नियन्त्रणमा लिइनेछ ।
सीमाक्षेत्रमा अफगानिस्तानले सुरक्षा व्यवस्था कडा पारेको छ । उसले सीमाक्षेत्रमा सेनाका टुकडी तैनाथ गरेको छ । सोमबार पनि नक्कली पाकिस्तानी कार्ड बोकेका २ सय व्यक्तिलाई अफगानिस्तानले सीमाक्षेत्रमा रोकेको थियो । सिन्वारी जातिका हजारौं आदिवासी दुरन्द सीमारेखा नजिकै बसोवास गर्दै आएका छन् ।
उनीहरूलाई अफगानिस्तानको खैबर प्रान्तको सरकारले राहदारी उपलब्ध गराउँदै आएको थियो । राहदारी प्रत्येक ६ महिनामा नवीकरण गरिन्छ ।
प्रतिक्रिया दिनुहोस !
