काठमाडौंः रंगमञ्चका पछिल्लो पुस्ताले उनलाई ‘विष्णुभक्त बा’ भन्थे । कलाकारितामा ठूलो उचाइ हासिल गरेका होइनन् तर एक कलाकार जसले साढे पाँच दशकसम्म निरन्तर रंगमञ्च यात्रा गरे । रंगमञ्चमै प्राण त्याग्ने चाहना भए पनि सोचेका थिएनन् होला यस्तो मरण । यति भव्य शवयात्राले आफूलाई बिदा गर्ला भन्ने उनलाई के थाहा ?
रंगमञ्चमा अभिनय गर्दागर्दै प्राण त्यागेका विष्णुभक्त फुयाँलको मंगलबार साँझ अन्त्येष्टि गरिएको छ । कलाकारदेखि राजनेताहरूले उनलाई श्रद्धाञ्जलि दिए । पूर्वप्रधानमन्त्री केपी ओली, नेताहरू प्रदीप ज्ञवाली, रामचन्द्र पौडेल, माधवप्रसाद नेपाललगायतका नेताले उनलाई श्रद्धाञ्जलि दिए । प्रज्ञा प्रतिष्ठानमा श्रद्धाञ्जलि दिइसकेपछि उनलाई पशुपति आर्यघाट पु¥याइएको थियो । फुयाँलले रंगकर्ममा सुनील पोखरेलबाट धेरै सिक्न पाएको बताउँथे । प्रिय दाजु फुयाँलको निधनपछि सुनीलको आँखा मंगलबार बेलुकासम्म ओभाएका थिएनन् ।
आर्यघाटमा ढलिरहेका फुयाँलको मृत शरीरको निधानमा चुम्बन गरेर सुनील हिँडिहाले । अलि वर आएर भने, ‘हेर्नै मन लागेन ।’ पाको मान्छे विष्णुले सुनीललाई ‘सर’ भनेर सम्बोधन गर्थे । तिहारमा सेलरोटी र अचार बोकेर सुनीलको घरमै पुग्थे । उनीहरूबीच व्यावसायिकभन्दा पारिवारिक सम्बन्ध थियो । असल कलाकारसँगै उनी असल मान्छे थिए । ‘मरेर गएको मान्छेलाई चाकडी गर्न भनेको होइन, उहाँ साँच्चै राम्रो मान्छे हो’, सुनील भन्छन्, ‘मैले उहाँसँग नाटक खेल्न पाएँ, यो मेरो भाग्य हो ।’
धेरैलाई मीठो सम्झना छोडेर बिदा भए । तीतो सत्यमा ‘योर माई लभ बा’को रूपमा चर्चा कमाएका फुयाँल दीपकराज गिरीका लागि उत्तिकै सम्मानीत थिए । यही टेलिचलचित्रबाट चर्चित भएपछि उनले दीपकलाई भन्ने गर्थे, ‘बाबु मलाई के बनाइदियौ तिमीहरूले बाटोमा निस्कनासाथ सबैले चिन्छन् ।’ सुटिङमा आउँदा उनले कहिल्यै कुनै कुराको माग गरेनन् । एक कप चिया पिउँथे, काम सकेर फर्कन्थे । ‘बिरामी भएर आउँदा पनि गीत बज्नासाथ फूर्तिका साथ ‘योर माई लभ’ भन्नुहुन्थ्यो’, दीपक सम्झन्छन् ।
विद्युतीय शवदाह गृहमा उनको अन्त्येष्टि गरियो । सांस्कृतिक संस्थानले प्रज्ञा प्रतिष्ठानमा श्रद्धाञ्जलि सभा आयोजना गरेपछि आर्यघाटमा एमाले पार्टीले सभा आयोजना ग¥यो । उनका दुई छोराले उनको अन्त्येष्टि गरे । एक छोरा अमेरिकामा छन् । बुवालाई अनावश्यक संस्कार मन नपर्ने भएकाले छोराहरू १३ दिन किरिया नबस्ने भएका छन् । माहिला छोरा कमल फुयाँलले सात दिनमा काजकिरिया सक्ने बताए ।
सांस्कृतिक संस्थानले १३औं दिनमा श्रद्धाञ्जलि सभा आयोजना गर्ने जानकारी महाप्रबन्धक राजेश थापाले दिए । थापाले फुयाँलको स्मृतिग्रन्थ निकाल्ने तयारी सुरु गरिसकेका छन् । ‘याज्ञवल्क्य’ नाटकमा अभियन गर्दागर्दै निधन भएका फुुयाँललाई हृदयाघात भएको थियो । ७९ वर्षीय फुयाँलले दर्जनौं नाटक र टेलिचलचित्रमा अभिनय गरेका छन् । उनका दुईवटा नाट्यकृति प्रकाशित छन् ।
प्रतिक्रिया दिनुहोस !
