हिजोआज प्राय. धेरैले कपाल रंग्याउने गर्छन् । कतिले आफ्नो फुलेको सेतो कपाल छोप्नलाई रङ लगाउँछन् त कतिले आफ्नो कपालको प्राकृतिक रङभन्दा अलि भिन्न देखिन रंग्याउने गरेको पाइन्छ ।
कपाल रंग्याउँदा सही तरिका अपनाउनु पर्छ नत्र कपालको गुणस्तर बिग्रिन सक्छ । रङ राम्रो ब्रान्डको छान्नुपर्छ । जस्तो पायो उस्तै कम्पनीको रङ लगाउँदा कपाल बिग्रिन सक्छ ।
गहँगोरो र गोरो छालालाई रातो, ब्लन्ड, चेरी रातो, चकलेट कलर बढी सुहाउँछ भने अलि कालो छालालाई हल्का खैरो रङ बढी प्रयोगमा आउने गरेको छ । आफ्नो कपालको लागि रङ छनोट गर्दा पेसाअनुसार सुहाउने रङ छान्नुपर्छ ।
कपाल रंग्याउने तरिका
. पहिले कपाललाई नुहाएर सफा गर्ने ।
. कपाललाई सुक्खा बनाउनुपर्र्छ ।
. कपाल रंग्याउँदा जहिले पनि कपालको टुप्पोदेखि लगाउन सुरु गर्नुपर्छ ।
. कपाल रंग्याउँदा टुप्पोमा १२ प्रतिशतको डेभलपर प्रयोग गर्नुपर्छ भने तालुको भागमा ६ प्रतिशत भोलुमको डेभेलपर प्रयोग गर्नु उपर्युक्त हुन्छ । यसो गर्दा कपालमा एकै थरीको रङ बसेको देखिन्छ । कुन डेभेलपर कति प्रतिशतको हो भन्ने रङको बट्टामै लेखेको हुने हुनाले रङ किन्दा नै ध्यान दिएर छान्नुपर्ने हुन्छ ।
. दुई भिन्न प्रतिशतको रङ दुई भिन्न बाउलमा राख्नुपर्छ ।
. कलर र डेभेलपर मिसाउन धातुको नभई प्लास्टिक वा काँचको बाउलको प्रयोग गर्नुपर्छ ।
. कपाल रंग्याउँदा हातमा पन्जा लगाउनुपर्छ ।
. पहिले हाइलाइट गरेर कलरिङ गर्यो भने सबैतिर बराबरी रङ बस्छ, नत्र बस्दैन । त्यसैले छुट्टाछुट्टै डेभेलपर प्रयोग गर्नु राम्रो हुन्छ ।
तालुको भागमा भर्खर उम्रिएको कपाल हुने भएकाले कम भोलुमको डेभेलपर प्रयोग गर्नुपर्छ ।
. यसरी रङ लगाएर ३० देखि ४५ मिनेटसम्म छाड्न सक्छौं । समय पुगेपछि स्याम्पु गरेर कन्डिसनर लगाउनुपर्छ । कन्डिसनर लगाएर १० मिनेट छाडेपछि मात्रै पखाल्नुपर्छ । . आफ्नो इच्छानुसार कपाललाई फुकाएर स्टायल गर्न सकिन्छ । . सेतो फुलेको कपाल छोप्नलाई भने गाढा खैरो वा खैरो रङ प्रयोग गर्ने गरिन्छ । त्यसमा ६ प्रतिशत डेभेलपरमात्रै प्रयोग गरिन्छ ।
. यदि कसैको छाला संवेदनशील छ भने कपाल रंग्याउँदा उसलाई एलर्जी पनि हुन्छ । त्यसैले रङ लगाउनु अगाडि प्याच टेस्ट गर्नु जरुरी हुन्छ । यसको लागि कानको पछाडिको भागमा सफा गरेर कपालमा लगाउने रङ लगाउँदा करिब तीनदेखि २४ घन्टाभित्रमा सहनै नसक्ने गरी पोल्ने, घाउ खटिरा आउने ग¥यो भने त्यस्तो व्यक्तिले रङको प्रयोग गर्नुहुँदैन ।
मानिसको कपालको वास्तविक रङ सेतो नै हुन्छ । मेलानिन नामक पिगमेन्टका कारण कपालमा विभिन्न रङ आउने गर्छ । पछि गएर हाम्रो कपाल सेतो हुनुको कारण एउटा उमेर पनि हो । त्यसैगरी भिटामिनको कमी, लामो समयदेखि बिरामी हुनु, व्यस्तता, तनाव, प्रदूषण, खानपानमा समय नमिल्नु र सन्तुलित आहार नहुँदा पनि कपाल चाँडै फुल्ने गर्छ । भिटामिन बी १२को कमी पनि कपाल फुल्ने एउटा कारण भएकाले हामीले नियमित रूपमा अन्डा, माछामासु, चीजलगायतका खाद्यपदार्थ खानुपर्छ । महिनैपिच्छे रङ लगाउँदा पनि कपालको गुणस्तर खस्कने हुनाले यसमा पनि ध्यान दिनु जरुरी छ ।
क्लाइन्टको चित्तमा खुसी
ब्युटिसियनसम्बन्धी एडभान्स कोर्स गरेर अमिता श्रेष्ठले २०५८ सालदेखि पार्लर सुरु गरेकी हुन् । हुन त उनलाई पहिले जागिर खाने रहर थियो । तर पछि साथीहरूसँगको लहैलहैमा उनले ब्युटिसियनको तालिम लिइन् । पछि काम गर्दै जाँदा अरूलाई सुन्दर बनाउने यस पेसाले उनलाई पनि आकर्षित पा¥यो । अहिले नाम र दाम दुवै हिसाबमा उनी सन्तुष्ट छिन् । आफूकहाँ आउने क्लाइन्टलाई चित्त बुझाउन सक्नु सबैभन्दा ठूलो खुसी हो भन्ने अमिताले आफ्नो पार्लरमा नेल आर्ट र मेहेन्दीका डिजाइन पनि गर्ने गरेकी छन् । त्यसैगरी सौन्दर्यकलालाई आफ्नो पेसा बनाएर जीविकोपार्जन गर्न चाहने महिला तथा छोटो समयको कोर्स गरेर विदेश जान चाहनेलाई उनले ६ महिने तालिम पनि दिने गरेकी छन् ।
रामकला खड्का
प्रतिक्रिया दिनुहोस !
