काठमाडौं: सेकेन्ड सेकेन्ड गन्दै प्रतीक्षारत दर्शकले काठमाडौंको टुँडिखेलस्थित भव्य मञ्चमा जब नेपथ्यलाई देखे, शनिबारको साँझ एकैपटक धुलिमण्डल बन्यो । ब्यान्डको आगमनसँगै दर्शकदीर्घामा बसेका युवा 'हुटिङ' गर्दै उफ्रिन थाले । जोशिलो गीतसंगीतसँगै प्रस्तुत भएको नेपथ्यले यसपटकको कार्यक्रममा नेपाल संगीत नाट्य प्रज्ञाप्रतिष्ठानका कुलपति सरुभक्तले लेखेको गीत सुनायो ।
'कुरूप अनुहार हो, यहाँ कोही साथी छैन
बेरूप अनुहार हो, यहाँ कोही साथी छैन ।'
विक्रम गुरुङको संगीतमा रहेको यो गीत नेपथ्यको कार्यक्रममा पहिलोपटक प्रस्तुत भएको हो । दर्शकदीर्घामा बसेर आफ्नै शब्दलाई रक संगीतमा सुनेर आनन्द लिँदै थिए सरुभक्त । यो गीतसँगै नेपथ्यले 'खान्नँ म त लामपाते सुरती' र 'यानीमाया' प्रस्तुत गयो । ब्यान्डका गायक अमृत गुरुङ हरेक गीत तयार पार्दाको अनुभव र त्यससँग जोडिएका समुदायका बारेमा बताउँदै गीत प्रस्तुत गर्छन् । उनको यो शैली यस पटकको कन्सर्टमा पनि देखियो । पृष्ठभूमिमा म्युजिक भिडियसहित प्रस्तुत भयो गीत, 'भेडाको ऊनजस्तो ।' लोकशैलीका गीत बज्नासाथ दर्शक नाचि हाल्थे । कार्यक्रममा युवाको ठूलो जमात दुई घन्टासम्म कत्ति पनि नथाकी नाचिरहे ।
नेपथ्यका गायक अमृत गुरुङ प्रस्तुतिका क्रममा गीत तयार पार्दाको अनुभव र त्यससँग जोडिएका समुदायका बारेमा बताउने गर्छन् । उनको यो शैली यसपटकको कन्सर्टमा पनि देखियो । नेपथ्यका गीत नयाँ र पुराना दुवै पुस्तामा उत्तिकै लोकप्रिय छ ।
नयाँ र पुराना पुस्ता जोड्न सफल सांगीतिक समूह नेपथ्यले देशका विभिन्न स्थानलाई पनि जोड्ने प्रयास गरेको छ । अमृतले हरेक कार्यक्रममा आन्तरिक पर्यटनलाई प्रवद्र्धन गर्छन् । गाउँगाउँमा पुगेर स्थानीयवासीसँगै बसेर त्यहाँको भाका टपक्क टिप्नु उनको विशेषता नै हो । पुराना हुन् या नयाँ, उनका गीत उत्तिकै लोकप्रिय छन् । कार्यक्रममा उनले भर्खरै तयार भएको नयाँ कृतिसँगै २७ वर्ष पुरानो गीत पनि सुनाए । श्रोताले अत्याधिक रुचाएका 'छेक्यो छेक्यो देउराली डाँडा', 'जोमसोमै बजारमा', 'हे रामा' गीत नेपथ्यको हरेक प्रस्तुतिमा समावेश हुन्छन् ।
विदेशका नेपालीलाई नेपाली माया बाँड्दै हिँड्ने नेपथ्यको सांगीतिक प्रस्तुति नेपालमा रहनेका लागि समेत ठूलो मेला हुने गर्छ । अंग्रेजी नयाँ वर्षका अवसरमा आयोजित कार्यक्रममा उपस्थित दर्शकको दृश्य कुनै मेलाजस्तो देखिन्थ्यो । अमृत आफैंले नाच्दै दर्शकलाई नचाउँदै पुसको चिसो साँझलाई तातो बनाए । 'पल्सर डेयर भेन्चर ग्रान्ड फिनाले'का अवसरमा कार्यक्रम आयोजना गरिएको हो ।
भिडियो हेर्नुहोस्
प्रतिक्रिया दिनुहोस !
