मिसेस एसिया इन्टरनेशनल–२०१७ मा नेपालबाट परिकल्पना सहभागी हुने

काठमाडौंः मलेसियाको क्वालालाम्पुरमा हुने मिसेस एसिया इन्टरनेशनल–२०१७ को प्रतियोगितामा नेपालबाट परिकल्पना राई सहभागी हुने भएकी छिन्।

यही जुनदेखि जुलाईसम्म लगातार एक महिनाभन्दा लामो समय चल्ने प्रतियोगितामा नेपालसहित ३५ देशको सहभागिता रहनेछ। उक्त प्रतियोगितामा सहभागी हुन परिकल्पनालाई पठाउन लागिएको मिसेस एसिया इन्टरनेशनलका एसोसियट इभेन्ट म्यानेजर तथा रिबन इन्टरटेन्मेन्ट नेपालका प्रमुख निशुकान्त झाले जानकारी दिए।

मिसेस नेपाल इन्टरनेशनल २०१५ को सेकेन्ड रनर अपका साथ मस्ट क्रियटिभ र भिओर्स च्वाइस समेत रहेकी राईलाई नै उक्त प्रतियोगितामा पठाउने निर्णय गर्नुको कारणबारे प्रमुख झाले भने,‘उनी धेरै तेजस्वी, ऊर्जावान, क्षमतावान र प्रतिभाशाली रहेका कारण पठाउन खोजिएको हो। उनी त्यो उपाधि चुम्नका लागि उपयुक्त पात्र हुन्। त्यसैले हाम्रो रोजाईमा परिकल्पना परिन्।’

प्रतियोगितामा नेपालबाट पहिलो पटक सहभागिता हुन लागेको समेत झाले जानकारी दिए। अन्तर्राष्ट्रिय क्षेत्रमा प्रतिनिधित्व गरेर प्रतियोगितामा भाग लिन जान पाउँदा आफूलाई निकै खुशी लागेको राईले बताइन्। उनले भनिन्,‘मलाई निकै खुशी लागेको छ। र आफूलाई मैले भाग्यमानी ठानेकी छु।’