काठमाडौं : प्रहरी प्रधान कार्यालयले त्रिभुवन अन्तर्राष्ट्रिय विमानस्थलबाट ३३ किलो सुन बाहिरिनुलाई गम्भीर ‘सुरक्षा कमजोरी’ (सेक्युरिटिज ल्यापसेज) भएको भन्दै विमानस्थलका प्रहरी वरिष्ठ उपरीक्षक (एसएसपी) श्याम खत्रीलाई प्रहरी मुख्यालयमा फिर्ता बोलाएको छ ।
प्रहरी प्रधान कार्यालयले आइतबार नै फिर्ता बोलाउने निर्णय गरेपछि खत्री सोमबारबाट विमानस्थल गएनन् । खत्रीलाई त्यस दिनको सुरक्षा कमजोरी र घटनामा उनको संलग्नता भए-नभएकोबारे छानबिन गर्न फिर्ता बोलाइएको स्रोतले बताएको छ ।
विमानस्थल भन्सार कार्यालयले पनि यसअघि नै घटनामा संलग्न भएको आशंकामा दुई दर्जन कर्मचारीलाई काम गर्नबाट रोकिसकेको छ । विमानस्थल सुरक्षा प्रमुखमा अहिले डीआईजी गोविन्द निरौला छन् ।
प्रहरीको केन्द्रीय अनुसन्धान ब्युरोले पुस २१ गते विमानस्थलको सुरक्षा र भन्सार कटाएपछि पिंगलास्थान र गोठाटारबाट ३३ किलो सुनसहित तीन जनालाई पक्राउ गरेको थियो । भरपर्दो सूचनाका आधारमा ब्युरोका एसपी मीरा चौधरी नेतृत्वको टोलीले ३३ किलो सुनसहित तस्करीमा संलग्न तीनजनालाई पक्राउ गरेको थियो ।
विमानस्थलमा सुन भित्रिएको दिन गम्भीर सुरक्षा लापरबाही गरेको र सुन तस्करीमा संलग्न व्यक्तिहरूसँग सम्पर्क रहेको आशंकामा छानबिनका लागि खत्रीलाई मुख्यालयमा झिकाइएको महानिरीक्षक सचिवालय स्रोतले जनाएको छ ।
ब्युरोले आफ्नो प्रतिष्ठाको विषय बनाई उक्त सुन तस्करी प्रकरणलाई गम्भीर ढंगले अनुसन्धान गरिरहेको छ । नेपाल प्रहरीका सहप्रवक्ता ठाकुरप्रसाद ज्ञवालीले खत्रीलाई मुख्यालय झिकाइएको पुष्टि गरे ।
ब्युरोले आफ्नो प्रतिष्ठाको विषय बनाई सुन तस्करी प्रकरणलाई गम्भीर ढंगले अनुसन्धान गरिरहेको छ ।
‘प्रशासनिक कामका लागि प्रहरी मुख्यालयले उहाँलाई फिर्ता बोलाएको हो’, उनले भने । विमानस्थल प्रहरी र भन्सार कार्यालयको सुरक्षा जाँचबीच ठूलो परिमाणमा विमानस्थलबाट सुन बाहिरिनुले विमानस्थल प्रहरी र भन्सार कार्यालयका कर्मचारीमाथि ठूलो नैतिक प्रश्न उब्जाएको छ ।
ब्युरोले ३३ किलो सुनसहित नेपालगन्जका गोपालबहादुर शाही, मोरङ पथरी ८ का दिनबन्धु थापा र दुबईमै काम गर्दै आएका जनकपुर १२ का सन्तोष काफ्लेलाई पक्राउ गरेको थियो । पक्राउ परेकाको बयानका आधारमा प्रहरीले अर्का एकजनालाई पनि पक्राउ गरेको छ ।
प्रतिक्रिया दिनुहोस !
