सेफ चोरेर प्रहरीमाथि गोली प्रहार गर्ने दुईजना पक्राउ

काठमाडौं: सहकारीको सेफ चोरेर भाग्दै गर्दा प्रहरीमाथि गोली प्रहार गर्ने मध्येका दुई जनालाई प्रहरीले पक्राउ गरेको छ। महानगरीय प्रहरी अपराध महाशाखाले बुधबार मकवानपुर फाखेलका कुमार भन्ने निङ्मा लामा र पेमा लामालाई नियन्त्रणमा लिएको हो।

गत भदौ २३ गते राति ललितपुर झरुवारासीस्थित श्री सन्तानेश्वर बचत तथा ऋण सहकारी संस्थाको ढोका फोडेर सेफसँगै अन्य कागजता चोरी भएको थियो । सेफ चोरेर ना १ ज ३९४८ नम्बरको टाटा सुमोमा राखी लैजाने क्रममा चन्द्रागिरी नगरपालिका च्यानडाँडामा प्रहरीले रोकेर सोधपुछ गर्न खोज्दा चोरको समुहले प्रहरीमाथि गोली प्रहार गरेको थियो। प्रहरीले जवाफी फायरिङ गरेपछि चोरले सेफसहितको टाटासुमो छाडेर भागेका थिए ।

महाशाखाका अनुसार फरार मध्येका एक निङ्मा केही समय सर्लाहीमा लुकेर बसेका थिए । निङ्मा सुमोका चालक हुन् । उनले दुई महिनादेखि काठमाडौं –सर्लाही रुटमा सुमो चलाउँदै आएका थिए । महाशाखाका प्रमुख एसएसपी सर्वेन्द्र खनालका अनुसार घटनामा संलग्न अन्य दुई जना फरार छन्।

तत्कालीन समयमा प्रहरीले सहकारीका कर्मचारीको सहयोगमा सेफ खोलेर हेर्दा जम्मा २५ हजार रुपैयाँ र केही कागजात मात्रै थिए।