नेपाल आइडलका आकर्षण

गायनबाट सुपरस्टार बन्ने प्लेटफर्मको रूपमा चर्चित 'आइडल' रियालिटी सो नेपालमा पनि भित्रिएको छ । सन् २००१, ६ अक्टुबरमा बेलायती टेलिभिजनमा फ्रिम्यान्टल मिडियाले पहिलोपटक पप आइडल प्रसारण गरेको थियो । रियालिटी टेलिभिजन गायन प्रतियोगितालाई बेलायती टेलिभिजन प्रोड्युसर साइमन फलरले सिर्जना गरेका हुन् । न्युजिल्यान्डको टेलिभिजन शृंखला पपस्टारलाई बेलायतले मान्यता लिएर प्रसारण गर्न थालेको हो ।

२००१ को जनवरीमा प्रसारण भएको यो शृंखलाबाट प्रेरित साइमनले 'पप आइडल' निर्माण गरेका थिए । पपस्टारले भन्दा पप आइडलले राम्रो दर्शक पाएपछि यस कार्यक्रमको लोकप्रियता झनै बढ्यो । पप आइडललाई लोकप्रिय बनाउने कारण यसका निर्णायकको भूमिका र यसका विजेता विल यंगको सफलता पनि थियो ।

पप आइडलकै आधारमा रहेर अमेरिकामा अमेरिकन आइडल सुरु भयो । पप शब्द लिएर पप आइडल चलाएकोमा पपस्टार सिर्जना गरेका जोनाथन डलिङले विवाद गरेपछि कानुनी रूपमा पप आइडल बन्द भयो । पोल्यान्डले पहिलोपटक आइडल संरचना 'एडप्ट' गरेर आइडल शीर्षकको गायन प्रतियोगिता सञ्चालन गर्‍यो । पप आइडलको पहिलो शृंखला बन्द भएपछि सन् २००२ मा आइडल सार्वजनिक भएको हो । अमेरिकन आइडल शृंखला सुरु भएपछि अमेरिकामा यो निकै लोकप्रिय भयो ।

यसलाई अमेरिकी टेलिभिजनको इतिहासमै धेरै लोकप्रिय कार्यक्रममध्ये मानिन्छ । अहिले विश्वका ४६ मुलुकले आइडल शृंखलाको अनुमति लिएका छन् । सन् २००४ देखि भारतमा पनि इन्डियन आइडल सुरु भयो । पहिलो इन्डियन आइडल अभिजित सावन्त बनेका थिए ।

नेपालमा इन्डियन आइडलको लोकप्रियता तेस्रो संस्करणदेखि देखिएको हो । तेस्रो सिजनमा नेपालीभाषी प्रशान्त तामाङले सहभागिता जनाएपछि प्रशान्तलाई जिताउन नेपालीले अभियान नै चलाएका थिए । टोलटोलमा प्रोजेक्टरमार्फत इन्डियन आइडल हेरिएको थियो । प्रशान्तले इन्डियन आइडल जितेपछि नेपालीमा उत्सव छाएको थियो । इन्डियन आइडलको छ संस्करण सम्पन्न भइसकेको छ ।

अहिले सातौं सिजन चलिरहेको छ । अमेरिकामा १५ संस्करण सम्पन्न भइसकेको छ भने जर्मनीमा १४औं संस्करण चलिरहेको छ । फ्रान्स, दक्षिण अफ्रिका, इन्डोनेसिया, अस्ट्रेलिया, ब्राजिललगायतका देशमा आइडलको लोकप्रियता उत्तिकै छ ।

एपी वन टेलिभिजनमार्फत नेपालमा पहिलोपटक आयोजना हुन लागेको नेपाल आइडलका लागि नेपालीको व्यग्रता निकै पहिलेदेखि नै देखिन थालेको थियो । नेपाल आइडलको अडिसन शनिबारदेखि सुरु हुँदैछ । अनुमति चाहने समूहका बारेमा राम्रो अध्ययन गरेरमात्र फ्रिम्यान्टलले अनुमति दिने गरेको छ । जसमा देशअनुसारको सम्झौता हुन्छ । नेपाल आइडल विजेताले २० लाख रुपैयाँ, १५ लाख रुपैयाँ बराबरको भीडीयो एल्बम र ३१ लाख ४५ हजार रुपैयाँ बराबरको गाडी पुरस्कारले पनि नेपाल आइडलको आकर्षण बढाएको छ । यति ठूलो पुरस्कार राशि दिने यो नै पहिलो नेपाली रियालिटी सो हो ।

विश्व चर्चित कार्यक्रमको फ्रेन्चाइज लिएर नेपालमा सञ्चालन गरिएको पनि यो पहिलो कार्यक्रम हो । यसमा केवल गायनमात्र नभई प्रतियोगीको पारिवारिक पृष्ठभूमि, भावनात्मक पक्षको बारेमा पनि देखाइनेछ । यसले दर्शकलाई भावनात्मक रूपमा कार्यक्रमसँग जोड्ने विश्वास गरिएको छ ।

नेपाल आइडल सातामा दुई शृंखला प्रसारण गर्ने गरी कुल ३२ शृंखला प्रस्तुत गरिँदै छ । टेलिभिजनले सातामा एक दिन 'नेपाल आइडल एक्स्ट्रा' भनेर छुट्टै प्रसारण गर्नेछ । प्रतियोगिताको निर्णायकमा न्ह्यु वज्राचार्य, इन्दिरा जोशी र कालीप्रसाद बास्कोटा छन् भने सुशील नेपाल र रीमा विश्वकर्मा कार्यक्रम प्रस्तोताका रुपमा रहने छन् ।

कार्यक्रम प्रस्तोताका उत्साह

रीमा विश्वकर्मा

गीत गाउन आउँदैन । अभिनयसँग सम्बन्धित भएको भए नौलो लाग्दैनथ्यो । तर अन्तर्राष्ट्रिय फ्रेन्चाइज आइडलमा कार्यक्रम प्रस्तुत गर्न पाउँदा म एकदमै उत्साही छु । सांगीतिक क्षेत्रमा आफूलाई स्टारको रूपमा देख्न चाहनेहरूको लागि यो सुनौलो मौका हो । उनीहरूको प्रतिभालाई परिपक्व बनाउने एउटा मञ्च हो । जसरी गायन क्षेत्रमा लाग्नेहरूका लागि यो मञ्च विशेष छ, त्यसरी नै मेरो लागि पनि विशेष छ ।

मेरो करियर टेलिभिजनबाटै सुरु भएको हो । समाचार वाचनबाट टेलिभिजनमा देखिएकी थिएँ । यो शोमा मेरो स्क्रिप्ट बिनाको प्रस्तुति दर्शकले देख्नुहुनेछ । यसले मेरो करियरलाई बुस्ट गर्ने विश्वास लिएकी छु । टेलिभिजनलाई म सधैं करियर मान्ने भएकाले फेरि टेलिभिजनको फ्रेमभित्र फर्किने मौका पाएकी छु । कार्यक्रम प्रस्तोताको हिसाबले दर्शकसँग प्रत्यक्ष अन्तक्रिया गर्ने अवसर पाइने हुँदा खुसी लागेको छ । मेरा फ्यानहरूसँग साक्षात्कार हुने मौका पाउँदैछु ।

सुशील नेपाल

नेपाल आइडलको लागि हरेक नेपाली उत्साही छन्, यसमा म पनि पर्छु । २० वर्षको कार्यअवधिमा धेरै शो गरेँ । अन्तर्राष्ट्रिय आइडलको फ्रेन्चाइज गर्न पाउनु मेरो लागि जति खुसीको कुरासँगै एउटा चुनौती पनि हो ।

आइडल टिमसँग केही दिनदेखि कार्यक्रमको तयारी गरिरहेको छु ।

नयाँ टेलिभिजन, नयाँ कार्यक्रम, नयाँ अनुभव हुँदैछ । नेपालमा अहिलेसम्म दुईवटा बेसमा रहेर रियालिटी शो भइरहेका छन् । एउटा गायन र अर्को नृत्य । प्रायः नेपालका चर्चित रियालिटी शोमा कार्यक्रम प्रस्तोताको रूपमा काम गरेको छु ।

सबै अनुभवमा यो सबभन्दा ठूलो चुनौती लागेको छ । आशा छ, दर्शक र सहभागीलाई सन्तुष्ट बनाउन सक्छु ।