आजदेखि नेपाल आइडल

नेपालगन्जः विश्वचर्चित टेलिभिजन फ्रेन्चाइज ‘आइडल'को नेपाली संस्करण ‘नेपाल आइडल'को अडिसन बुधबारदेखि सुरु हुँदैछ । नेपालगन्जमा दुई दिनसम्म हुने अडिसनपछि नेपाल आइडल टोली देशका अरू मुख्य सहरमा अघि बढ्नेछ । गायन क्षेत्रमा रुचि राख्ने प्रतिभाहरू अहिले उत्साहित देखिएका छन् । अडिसन सुरु हुने अघिल्लो दिनदेखि नै फाराम लिने र त्यसका बारेमा चासो राख्ने किशोरकिशोरीको भीड बढ्दो छ ।

नेपालगन्जको जयबागेश्वरी विद्यालयमा ७ बजेदेखि सुरु हुने अडिसनको सबै तयारी पूरा भइसकेको नेपाल आइडलका प्रोजेक्ट हेड सुरेश पौडेलले जानकारी दिए । ‘हामीले सबै तयारी पूरा गरिसकेका छौं, बिहान ७ बजेदेखि अडिसन सुरु हुन्छ', पौडेलले भने, ‘नेपालगन्ज र आसपासका क्षेत्रमा उत्साहजनक सहभागिता हुनेछ ।' उनका अनुसार नेपालगन्जबाट मात्रै कम्तीमा एक हजारले अडिसनमा भाग लिने अनुमान गरिएको छ । नेपालको सांस्कृतिक र सामाजिक विविधताभित्र एक अलग प्रतिभाको खोजी सुरु भएको उनको भनाइ छ ।

निकट भविष्यमै नियमित प्रसारणको तयारीमा रहेको नेपालको पहिलो एचडी टेलिभिजन एपी वानको प्रस्तुति यस प्रतियोगितामा १६ देखि ३० वर्ष उमेरका युवाले निःशुल्क प्रतिस्पर्धा गर्न पाउनेछन् । माघ १२ गते नेपालगन्जबाट सुरु हुने अडिसन बुटवलमा माघ १५, नारायणगढमा माघ १८, वीरगन्जमा माघ २१, विराटनगरमा माघ २४ र २५, पोखरामा माघ २९ र फागुन १ एवं काठमाडौंमा फागुन ७ र ८ गते हुनेछ ।

प्रतियोगितामा संगीतकार न्ह्यु वज्राचार्य, कालीप्रसाद बाँस्कोटा र गायिका इन्दिरा जोशी निर्णायक रहेका छन् । प्रतियोगिताको स्तर र पुरस्कार राशिले धेरैलाई आकर्षित गरेको छ । विजेताले ३१ लाख ४५ हजार रुपैयाँबराबरको महिन्द्रा कुप १०० कार, २० लाख रुपैयाँ र १५ लाख रुपैयाँबराबरको भिडियो एल्बम प्राप्त गर्नेछ ।