काठमाडौंः त्रिभुवन विश्वविद्यालयले स्वतन्त्र विद्यार्थी युनियन(स्ववियु) को निर्वाचन कार्यतालिका सार्वजनिक गरेको छ । फागुन १४ गते निर्वाचन गर्ने कार्यतालिका सार्वजनिक गरेपनि केन्द्रीय क्याम्पसमा नयाँ विद्यार्थी भर्ना नखोलेकोमा विद्यार्थी संगठनहरुले भने आपत्ति जनाएका छन् ।
सेमेष्टर प्रणालीको बार्षिक क्यालेण्डर अनुसार नियमित खोल्नुपर्ने भर्ना समेत नखोली बिद्यार्थीले चुन्न र चुनिन पाउने अधिकारबाट बन्चित गराएको भन्दै केन्द्रीय क्याम्पसका अनेरास्ववियु नेता माधव पन्तले आपत्ति जनाए ।
२०२० सालमा पहिलो पटक कीर्तिपुरमै स्वबियुको स्थापना भएपनि विद्यार्थी भर्ना बिनै चुनाब गर्न खोज्नु उचित नभएको उनको भनाई थियो । ‘कसकोबीचमा टियुले चुनाव गराउन खोज्दैछ, हजारौ बिद्यार्थीको चासोको बिषय बनेको छ' पन्तले भने । विद्यार्थीको चुनाव विद्यार्थीका लागि हुनुपर्ने भएपनि टियुले विद्यार्थी आन्दोलन कमजोर पार्ने हेतुले विद्यार्थी बिनै निर्वाचन गर्न लागेको आरोप लगाए ।
त्रिभुवन विश्वविद्यालयका विद्यार्थी कल्याण तथा खेलकुद निर्देशनायलका कार्यकारी निर्देशक गङ्गाबहादुर थापाले नयाँ भर्नाबारे आफूलाई थाहा नभएको बताए । नयाँ भर्नाबारे आफू जानकारी नभएपनि ‘कार्यतालिका अनुसार चुनाव हुने उनले विश्वास व्यक्त गरे । ‘कार्यतालिका सार्वजनिक हुनु नै चुनावको तयारी नै हो, केन्द्रीय क्याम्पसमा अहिले पनि दुई ब्याचका विद्यार्थी छन्' उनले भने ।
निर्वाचन कार्यतालिका अनुसार फागुन १ गते मतदाताको नाम प्रकाशित गर्ने, फागुन ४ गते उम्मेदवारलाई मनोनयन पत्र वितरण गर्ने, ५ गते बिहान ११ बजेदेखि ३ बजेसम्म प्रत्यक्ष र समानुपातिकका उम्मेदवारको नामावली दाखिला गर्ने, ५ गते ५ बजे प्रत्यक्ष तर्फको उम्मेदवारको नामावली प्रकाशित गर्ने, ६ गते उम्मेदवारको नामावली उपर दाबी विरोध गर्ने रहेको छ ।
८ बर्षपछि स्ववियु निर्वाचन गर्न लागेको त्रिविले पहिलोपटक उम्मेदवारको हदबन्दी २८ वर्ष तोकेको छ । यसैबीच यसअघि नै त्रिविले फागुन ५ गते त्रिवि कर्मचारी युनियनकोसमेत निर्वाचन गर्ने कार्यतालिका सार्वजनिक गरेकाे छ ।
प्रतिक्रिया दिनुहोस !
