काबुलः अफगानिस्तानको मध्य तथा उत्तरपूर्वी राज्यहरूमा व्यापक हिमवर्षापछि बढेको अधिक चिसो र हिमपहिरोका कारण पछिल्ला केही दिनयता भएका घटनामा ४२ जनाको मृत्यु भएको अफगानी अधिकारीले आइतबार बताएका छन् ।
मुलुकका उच्च पहाडी र हिमाली क्षेत्रमा उक्त समयमा भीषण हिमपात भएको र थुप्रै स्थानमा दर्जनौं मानिस हिउँमा फसेका यहाँको प्रशासनले जनाएको छ । वादखास्तान प्रान्तमा मात्रै दुई बालकबालिका, एक महिलासहित १८ जनाको हिम पहिरोमा परी मृत्यु भएको यहाँका प्रान्तीय प्रवक्ता नवीद फ्रोटानले बताएका छन् । त्यस क्षेत्रमा फसेका करिब ७० मानिसको उद्धारका लागि सरकारले व्यापक जनशक्ति परिचालित गरेको छ । केहीलाई भने मृत अवस्थामा आइतबार उद्धार गरिएको छ । त्यस क्षेत्रमा अझै पनि उद्धार कार्य जारी राखिएको छ ।
लगातारको हिमवर्षाका कारण अफगानिस्ताको राजधानी काबुलस्थित विमानस्थलमा अवतरण हुने र त्यहाँबाट बाहिरिने उडान सेवा पनि आइतबार पूरै प्रभावित भएका छन् । विमानस्थलमा उडान रोकिएपछि अलपत्र यात्रुले निकै सास्ती खेप्नुपरेको बताएका छन् । हिउँ र चिसोले अफगानिस्तानका अधिकांश क्षेत्रको जनजीवन प्रभावित बनेको छ ।
हिम पहिरोले एक बस्तीका केही घरलाई पुरेको र घरका भग्नावशेषभित्र दर्जनौं मानिस रहेको सूचनाका आधारमा उद्धार कार्य प्रभावकारी रूपमा भइरहेको प्रवक्ता नवीद फ्रोटानले जानकारी दिए । प्रावन राज्यको सियागर्ड सुर्खपर्षा जिल्लामा पनि हिम पहिरोका कारण १६ जनाको मृत्यु भएको छ ।
त्यसैगरी अफगानिस्तानकै सारीपुलको बाल्खव क्षेत्रमा हिम पहिरोमा पाँचजनाको मृत्यु भएको छ । त्यस क्षेत्रमा हिम पातका कारण सडक आवागमनमा समेत व्यापक समस्या भएको छ । —रासस/सिन्ह्वा
प्रतिक्रिया दिनुहोस !
