धरानः नेपालको पहिलो सांगीतिक रियालिटी शो ‘नेपाल स्टार' की विजेता तथा नायिका विष्णु चेम्जोङ मंगलबारबाट विवाहबन्धनमा बाँधिएकी छन् । प्रणय दिवसको अवसरमा उनले धरान- १५ निवासी निर्मल मगरसँग विवाह गरेकी हुन् ।
मगर संगीत संयोजक हुन् । लगभग एक दशक लामो प्रेमसम्बन्धलाई सार्थक बनाउँदै उनीहरूले मगर परम्पराअनुसार विवाह गरेका हुन ।सानै उमेरमा प्रेमसम्बन्ध स्थापित भए पनि गायन एवं अभिनयमा व्यस्त भएकाले विवाह हुन समय लागेको विष्णुले बताइन् । यस वर्ष भने दुवैतर्फको पारिवारिक सल्लाहअनुसार विवाह गर्ने निर्णयमा पुगेका हुन् ।
‘११ वर्षसम्म विष्णुसँग भएको प्रेममा कुनै मतभिन्नता नभएपछि विवाह गरी सँगै जिउने वाचा गरेका हौं', निर्मलले भने । विवाहपश्चात् पनि गायन र अभिनयलाई निरन्तरता दिने विष्णुले बताइन् भने निर्मलले उनको गायन र अभिनय यात्रालाई हरपल सहयोग गर्ने प्रतिबद्धता जनाएका छन् ।
प्रतिक्रिया दिनुहोस !
