भिक्षु पक्राउ गर्न थाई प्रहरी गुम्बामा

बैंककः थाइल्यान्डको प्रहरी रकम हिनामिना संलग्न एक भिक्षु पक्राउ गर्न राजधानी बैंककको बाहिरी क्षेत्रस्थित वाट धम्मकाया गुम्बामा छापा मारेको छ ।

यसअघि ४ करोड अमेरिकी डलर हिनामिनाको आरोप लागेका भिक्षु फ्रा धम्मजायो पक्राउ गर्न लामो समयदेखि निकैपल्ट प्रयास गर्दा प्रहरीलाई उनका अनुयायी हजारौं भिक्षुले अवरोध गरेका थिए । यसपछि प्रहरीले बिहीबार गुम्बामा छापा मारेको थियो ।

धम्मकाया गुम्बा यसपूर्व सैन्य नियन्त्रणमा लिइएको थियो । प्रहरीले मुद्रा अपचलनको आरोप लागेका भिक्षु धम्मजायो गुम्बाको विशाल परिसरभित्र लुकेको आशंका गरेको छ । उनीमाथि गुम्बाको कोष हिनामिना गरेको आरोप लागेको छ । तर प्रहरी अधिकारीले गत वर्ष जुनमा खोजी गर्न जाँदा उनका अनुयायीले गुम्बामा प्रवेश गर्न अवरोध गर्दै आएका थिए ।

बिहीबार बिहान सयौंसय प्रहरी र सैनिकले गुम्बा घेरेर सैन्य नियन्णमा लिँदै गुम्बामा आवागमन निषेध गरेको थियो । ‘हामी गुम्बा घेरेर सबै भवनमा खोजी गर्दैछौं', विशेष अनुसन्धान विभाग (डीएसआई)प्रमुख पाइसित वोङमाङले भने, ‘भिक्षुलाई आफू निर्दोष छु भन्ने लागेको भए उहाँले आत्मसमर्पण गर्नुपछ र न्यायीक प्रक्रियामा आउनुपर्छ ।'

७२ वर्षे धम्मजायो सिकिस्त भएकाले छानबिनमा प्रहरीसामु उपस्थित हुन नसक्ने भन्दै महिनौंदेखि गुम्बाबाट निस्केका छैनन् । उनले आरोप खण्डन गर्दै आफूले कुनै हिनामिना नगरेको र आफूविरुद्ध राजनीतिक पूर्वाग्रहका कारण यस्तो आरोप लगाइएको दाबी गरेका छन् ।

गुम्बाले विज्ञप्ति जारी गर्दै करिब ४ हजार प्रहरी र सैनिकले गुम्बा घेरी कसैलाई पनि गुम्बामा प्रवेश गर्न र निस्कन नदिएको जनाएको छ । थाइल्यान्डमा सन् २०१४ मा भएको कूपछि सैन्य शासन छ ।