काठमाडौंः हास्यकलाकार मनोज गजुरेल र डा.राजु अधिकारी स्टेजमा झुल्किएपछि दर्शक स्टेजतिर आकर्षित भए । दुईजना कुर्सीमा बस्नासाथ मनोजले राजुको शरीर छामछुम गर्दै प्रश्न गरे, ‘यही शरीरले हो त अहिले योग गरेको ? ' उनीहरू स्टेजमा देखिनुअघि राजुले योग प्रस्तुत गर्दा उनको शरीरको लचकता देखेर मनोजमात्रै होइन उपस्थित दर्शक पनि लोभिएका थिए । प्रसंग थियो डा. अधिकारीद्वारा लिखित पुस्तक ‘यस्तो होस् जीवनशैली' विमोचन ।
काठमाडौंको कमलादीस्थित नेपाल प्रज्ञा प्रतिष्ठानमा चलिरहेको तेस्रो राष्ट्रिय पुस्तक मेलाका क्रममा शुक्रबार पुस्तक विमोचन गरिएको हो । चल्तीमा रहेको विमोचन शैलीभन्दा पृथक् ढंगबाट गरिएको विमोचनमा लेखक डा. अधिकारी र हास्यकलाकार गजुरेलबीचको अन्तरसंवादले धेरैलाई आकर्षित गरेको थियो । अन्तरसंवादमा मनोजको प्रश्नको उत्तर दिँदै डा. अधिकारीले पुस्तकमाथि प्रकाश पारेका थिए । ‘बाहिर देखिने संसारको प्रभाव यति बढी छ मान्छेले भित्री संसार बिर्सिसके', पुस्तकबारे डा. अधिकारीले भने, ‘यो पुस्तक बाहिरी र भित्री संसारलाई जोड्ने कडी हो ।'
मान्छे बाहिरी संसारका बारेमा जानकार हुने चासो राख्ने तर आफूभित्रको संसारका बारेमा अनविज्ञ हुने तथ्य औल्याउँदै औषधि होइन जीवनशैलीले स्वास्थ्य ठीक गर्नुपर्ने बताए । ‘आवरण राम्रो हुन्छ तर आचरण राम्रो हुँदैन । त्यसैले जीवनशैली ठीक भएन भने रोग, भोग र शोकको सिकार हुने निश्चित छ', उनले ठोकुवा गरे । बिहान उठ्दै स्वास्थ्य मन लिएर उठ्नुपर्ने तर्कसहित लेखक अधिकारीले पुस्तकमा त्यही कामना गरिएको जानकारी दिए ।
अन्तरसंवादमा मनोजले पुस्तकमा समेटिएको सम्भोगकला, रात्रि चर्चा, खानापछि बेड चर्चाको प्रसंग पनि कोट्याए । त्यहाँ उपस्थित सबैलाई आकर्षित गरेको यो जिज्ञासाका बारेमा अधिकारीले भने, ‘जीवनमा सबै कला खुलेर सिकाइन्छ तर सम्भोगकला त्यसरी सिकाइँदैन । यो क्रिया जीवनको अनिवार्य अंग हो । त्यसैले यसलाई ध्यान, स्वास्थ्य र प्रसन्नताको माध्यम बनाउनुपर्छ ।'
गुरुको स्थान दोस्रो गुगलको स्थान पहिलो, बुकको स्थान दोस्रो फेसबुकको स्थान पहिलो हुनुलाई विकृतिको संज्ञा दिँदै उनले यस्तो होस् जीवनशैलीमा बिर्सिएको विधा, बिर्सिएको शिक्षा र जीवनको विधालाई प्रस्तुत गरिएको र सकेसम्म प्रामाणिक बनाउने प्रयास गरिएको जानकारी पनि दिए ।
खाने कसरी, पिउने कसरी भन्ने विषयमा १० वर्ष अध्ययन गरेर पुस्तक लेखेको उनको भनाइ थियो । ‘योग, ध्यान, आहारविहार र जीवनशैलीले जीवनलाई सुखमय बनाउनुपर्छ', लेखक अधिकारीले भने, ‘विकृत भोजनले धेरै रोगी भएका छन् । योग व्यायाम जति गरे पनि खानपान ठीक भएन भने स्वास्थ्य हुन सकिँदैन ।'
कार्यक्रमको सुरुमा विमोचन गरी कृतिमाथि चर्चा गर्ने परिपाटीविपरीत यो पुस्तक कार्यक्रमको अन्त्यमा लोकार्पण गरिएको थियो । पुस्तक डा. सुन्दरमणि दीक्षित, डा. भगवान कोइराला, डा.गोविन्द केसी, कृष्ण पहाडी, दिनेश थपलिया, शिव श्रेष्ठ, राजेन्द्रसिंह भण्डारीलगायतले संयुक्त रूपमा गरेको विमोचनसहित कार्यक्रम समापन गरिएको थियो । कृति मानव उत्कर्ष नेपालले प्रकाशन गरेको हो ।
प्रतिक्रिया दिनुहोस !
