कपाल काट्ने इलम स्वावलम्बनको एउटा पाटो हो । तपाईं सक्षम र सफल हेयर ड्रेसर बन्न सक्नुहुन्छ तर कसरी ? जोइको इन्टरनेसनलका आर्टिस्टिक डाइरेक्टर डेमियन कार्नेका सल्लाह यस्ता छन्:
१. बलियो आधार तयार गर्नुहोस् । गतिलो सीप र सौन्दर्यको राम्रो बुझाइसँग काम सुरु गर्नुहोस् ।
२. कार्यक्षेत्रमै पनि सिक्ने सिकाउने काम जारी राख्नुहोस् । सूचना र उत्साह तपाईंको वरिपरि नै हुन्छ । हरेक अनुभवले तपाईंलाई बलियो बनाउँछ ।
३. तपाईंको काममा अरूलाई आकर्षित गरिरहनुहोस् । तपाईंले आफ्नो उत्साह, क्षमता र सीप प्रदर्शन गर्न सक्नुभयो भने तपाईंले ग्राहक पनि प्रशस्तै पाउनुहुनेछ ।
४. गल्ती हुने डर नपाल्नुहोस् । तपाईंले चाहेजस्तो भएन, केही गल्ती भयो भने किन यस्तो भयो भन्ने पत्ता लगाउनुहोस् र अगाडि बढ्नुहोस् ।
५. ग्राहकको शरीर, रूप, रुचिलाई ध्यानमा राखेर तिनको हेयर स्टाइल छनोट गर्न सहयोग गर्नुहोस् ।
६. मेहनत गर्नुहोस् । सौन्दर्य उद्यममा हरेक दिन नयाँनयाँ चुनौती हुन्छ, त्यसको सामना गर्नुहोस् ।
७. तपाईंको कामलाई सामाजिक सञ्जालबाट प्रचार गर्नुहोस् । तपाईंले कपाल काट्नुअघि र पछिको फोटो खिचेर फेसबुक, ट्विटर र इन्स्ट्राग्राममा राख्नुहोस् । ग्राहकहरूको सुझाव र प्रतिक्रियाको ख्याल गर्नुहोस् ।
८. बिजनेस कार्ड र प्रचारमा अलिकति खर्च पनि गर्नुहोस् । हरेक भेटमा आफ्नो परिचय बाँड्नुहोस् । तपाईंलाई थाहा हुँदैन, कहिले नयाँ ग्राहकसँग भेट हुन्छ ।
९. व्यावसायिक प्रदर्शनीहरूमा पनि भाग लिनुहोस् । अरू हेयर ड्रेसरहरूसँगको सञ्जालमा सहभागी हुनुहोस् ।
१०. ग्राहकहरूसँग सहज हुनुहोस् । ग्राहकसँग समय मिलाउनुहोस् । ग्राहकको सुविधामा ध्यान दिनुहोस् ।
प्रतिक्रिया दिनुहोस !
