मधेसी मोर्चा सडक आन्दोलनमा : फेरि तराई अशान्त

वीरगन्ज : संविधान संशोधन नगरी सरकारले स्थानीय तहको निर्वाचन गर्ने घोषणा गरेपछि मधेसी मोर्चा मंगलबारदेखि फेरि सडक आन्दोलनमा उत्रिएको छ । मधेसका सबै जिल्ला सदरमुकाममा मधेसी मोर्चाले मंगलबार साँझ मसाल जुलुस प्रदर्शन गरेर आन्दोलन सुरु गरेको हो ।

बुधबार आह्वान गरिएको मधेस बन्दलाई सफल पार्न मंगलबार साँझ मधेसी मोर्चाले मधेसका सबै जिल्ला सदरमुकाममा जुलुस प्रदर्शन गरेको हो ।

वीरगन्ज र कलैयामा पनि मंगलबार साँझ मधेसी मोर्चाले मसाल जुलुस प्रदर्शन गरेको छ । वीरगन्जको घन्टाघर चोकबाट निस्किएको मसाल जुलुस माईस्थान, आदर्शनगर हँुदै नगरका विभिन्न भाग परिक्रमा गरी पुनः घन्टाघर चोकमै पुगेर कोणसभामा परिणत भएको थियो ।

कोणसभामा संघीय समाजवादी फोरम नेपाल पर्साका अध्यक्ष प्रदीप यादवले मधेसी दलसँग पटक–पटक धोका दिँदै आएका प्रधानमन्त्री पुष्पकमल दाहालले फेरि अहिले धोका दिएको बताए ।

मोर्चामा आबद्ध राजेन्द्र महतो नेतृत्वको सद्भावना पार्टीले पनि वीरगन्जमा मंगलबार बिहानै प्रधानमन्त्री दाहालको पुत्ला दहन गरेको छ । सद्भावना पार्टी पर्साका उपाध्यक्ष ईश्वर यादव नेतृत्वका नेता–कार्यकर्ताले घन्टाघर चोकमा सरकार र तीन दलविरुद्ध नाराबाजी गर्दै प्रधानमन्त्री दाहालको पुत्ला दहन गरेका हुन् ।

पुत्ला दहनपछि आयोजित कोणसभामा सद्भावना पार्टीका वीरगन्ज नगर अध्यक्ष ओमप्रकाश सर्राफले संशोधनविना सरकारले जबर्जस्ती चुनाव घोषणा गरी मुलुकमा फेरि मुठभेड निम्त्याउन खोजेको बताए ।

यस्तै, बाराको कलैयामा पनि मंगलबार बिहान मधेसी मोर्चाका कार्यकर्ताले टायर बालेर नाराबाजी गर्दै प्रदर्शन गरेका थिए ।

सरकारले ३१ वैशाखमा स्थानीय तह निर्वाचन गर्ने घोषणा गरेलगत्तै मधेसी मोर्चाले आन्दोलनका कार्यक्रम सार्वजनिक गरेको थियो ।

मोर्चाले बुधबार ११ गते मधेस बन्द गर्ने घोषणा पनि गरेको छ । बिहीबारदेखि १५ दिनसम्म गाउँ–गाउँमा भन्डाफोर कार्यक्रम पनि सञ्चालन गर्ने मोर्चाले जनाएको छ ।
स्वायत्त क्षेत्र र संरक्षित क्षेत्रको संख्या र सीमा निर्धारण नै नगरी अवैज्ञानिक, अधुरो र अपूरो प्रतिवेदनका आधारमा घोषणा गरिएको निर्वाचन मान्य नहुने मोर्चाको जिकिर छ ।

राजविराजमा पनि मसाल जुलुस प्रदर्शन
निर्वाचन मिति घोषणापछि आक्रोशित मधेसी मोर्चाले मंगलबार साँझ सदरमुकाम राजविराजका साथै जिल्लाका प्रमुख बजारमा मसाल जुलुस प्रदर्शन गरेको छ ।

संविधान संशोधनमार्फत आफ्ना माग सम्बोधन नगरी स्थानीय निकायको निर्वाचन मिति घोषणा गरेको विरोधमा मोर्चाका कार्यकर्ताले मसाल जुलुस प्रदर्शन गरेका हुन् ।
स्थानीय महादेव मन्दिर प्रांगणबाट मसालसहित निक्लिएका प्रदर्शनकारीले सरकारविरुद्ध चर्को नाराबाजी गर्दै नगर परिक्रमापश्चात् सोही स्थानमा पुगी विरोधसभा गरेका थिए ।

महोत्तरीमा पनि प्रदर्शन
संविधान संशोधनलाई पाखा लगाएर सरकारले निर्वाचन मिति घोषणा गरेको विरोधमा मधेसी मोर्चाले मंगलबार महोत्तरी सदरमुकाम जलेश्वरमा मसाल जुलुससहित प्रदर्शन गरेको छ ।

सयांै संख्यामा उपस्थित मोर्चा नेता–कार्यकर्ताले मसाल बोकी महोत्तरीको सदरमुकाम जलेश्वर नगरपरिक्रमा गर्दै बुधबार महोत्तरी पूर्णरूपमा बन्द रहने दाबी गरे ।