राप्रपामा जित्ने कलाकारहरू

काठमाडौं: राष्ट्रिय प्रजातन्त्र पार्टीको एकता महाधिवेशनमा तीन जना चर्चित कलाकारले चुनाव जितेका छन् । बुधबार भएको केन्द्रीय सदस्यको मतगणनाअनुसार चुनाव जित्नेमा गायिका मीरा राणा, कोमल वली र नायिका रेखा थापा छन् । राणा र थापाले महिलातर्फ र वलीले खुलामा चुनाव जितेकी हुन् । महिला आरक्षण तर्फबाट १६ जनाका लागि भएको चुनावमा थापाले दोस्रो र राणाले तेस्रो स्थानमा जितेकी छन् ।

चुनावमा थापाले १६०३ र राणाले १५५२ मत प्राप्त गरिन् । खुला तर्फबाट वलीले १८५७ मत प्राप्त गरेकी छन् । त्यसैगरी, खुला तर्फबाट केन्द्रीय सदस्यका लागि उम्मेदवार भएकी वलीले सर्वाधिक तेस्रो स्थानको मत प्राप्त गरेकी हुन् । महिलातर्फ भने उक्त पार्टीका सांसद कुन्ती शाहीले सबैभन्दा बढी मत ल्याएर चुनाव जितिन् । नायिका रेखा थापाले आफू कलाकारिता क्षेत्रमा रहे पनि राजनीतिबाट टाढा नभएको प्रतिक्रिया दिइन् ।

उनले अन्नपूर्णसँग भनिन्, ‘राजनीतिलाई नयाँं पुस्तामा ल्याउन पनि राप्रपाको महाधिवेशनमा केन्द्रीय सदस्यमा चुनाव लडेकी हुँ ।’ उनले अन्य पार्टीमध्ये राप्रपा आफूलाई मन परेकाले रोजेको बताइन् । ‘अब राजनीतिमा नयाँं पुस्ता आउनुपर्छ त्यही भएर चुनावमा भाग लिएकी हुँँ’, उनले भनिन् ।

०७१ सालमा भएको चुनावमा मीरा राणा केन्द्रीय सदस्यको उम्मेदवार भएकी थिइन् । उनले त्यसबेला सबैभन्दा बढी भोट ल्याएर जित हासिल गरेकी हुन्। यसपटक पनि चुनाव जितेकोमा आफू खुुसी र उत्साहित भएको राणाले प्रतिक्रिया दिइन् । उनले भनिन्, ‘मैले देशभरबाट यसरी भोट पाउनुमा आधा सांगीतिक योगदानको प्रतिफल हो । राजनीतिमा आएको आठ वर्ष भयो । कलाकारिताबाट जनतामा पुग्थेँ । राजनीतिबाट पनि जनतामै पुग्ने हो ।’ उनले राजनीतिबाट जनतामा जाँंदा दुःख–सुख बाँडिने अनुभव सुनाइन् ।

उनले राजनीति देशको खम्बा भएकाले यसलाई बलियो बनाउनुपर्ने बताइन् । राजनीतिमा आए पनि कलाक्षेत्र भने छाड्न नसक्ने उनको भनाइ छ । उनले भनिन्, ‘पार्टीले जे जिम्मेवारी र आदेश दिन्छ त्यो निर्वाह गर्छु तर कलाक्षेत्र भने छाड्न सक्दिनँ ।’ राणाले आफ्नो क्षेत्रमा असर नपर्ने गरी सबै पेसा–व्यवसायका मानिसले राजनीति गर्नुपर्नेमा जोड दिइन् ।